Линктер

ЧУКУЛ КАБАР!
1-Декабрь, 2021 шаршемби, Бишкек убактысы 04:01

Пакистанда христиан аял биротоло акталды


Асия Биби.

Пакистандын Жогорку соту "исламга жана пайгамбарга акарат келтирди" деп соттолуп, кийин акталган христиан аял Асия Бибинин ишин кайра кароо тууралуу өтүнүчтү четке какты.

Жогорку сот 28-январдагы чечими менен аны актаган буга чейинки өз өкүмүн коргоду. Асия Биби былтыр октябрда акталган, бирок ашынган динчилдер аны бошотууга каршы чыгып, ири жүрүштөрдү уюштургандан кийин бийлик христиан аялдын ишин кайра кароого макул болгон.

- Анын ишин кайра кароо боюнча өтүнүч четке кагылды, - деди Жогорку соттун төрагасы Асиф Саид Хоса.

Былтыр октябрда сот актагандан бери толук эркиндикке чыгарылбай, коопсуздугунан улам бийлик жашыруун жерде кармап жаткан Асия Биби үчүн бул эң акыркы өкүм болмокчу. Башкача айтканда ал эми толук боштондукка чыгарылат.

- Анын качан кетерин өзүнөн сурап көрүңүз. Менимче, тез арада, балким бүгүндөн калбай кетет. Ал үчүн бул жер коопсуз эмес, өлкөдөн чыгып кетиши керек, - деди Асия Бибинин адвокаты Сайфулла Мулк.

Пакистандын Жогорку соту.
Пакистандын Жогорку соту.

Беш баланын энеси, 54 жаштагы христиан аял «пайгамбарга акарат келтирген» деп айыпталган. Ал 2009-жылы июнда камакка алынып, бир жылдан кийин райондук сот өлүм жазасына өкүм кылган. Райондук соттун өкүмүн 2014-жылы Жогорку соттун Лахор шаардык бөлүмү да күчүндө калтырган. Бирок Бибинин адвокаты апелляциялык арыз менен кайрылгандыктан эң жогорку жазаны аткаруу убактылуу токтотулган. Ал эми былтыр октябрда Жогорку сот христиан аялды актаган.

Бирок буга каршы болгон ашынган динчилдер бир канча шаарда нааразылык акцияларын уюштуруп, полиция менен кагылышкан жана ал Карачи, Лахор шаарларында башаламандык менен коштолгон. Бир канча партиянын башын кошкон «Муттахида мажлисил амал» биримдигинин башчысы Маулана Фазл Рахман буларды билдирген болчу:

- Өлкөнүн ар бир бурчунан исламдын уулдары Жогорку соттун өкүмүнө каршы көчөгө чыгышты. Жогорку соттун өкүмү менен акталган Асия Бибиге эл өз өкүмүн чыгарып жатат. Элдин соту Жогорку соттун чечимин четке какты. Биз эл аралык коомчулуктун басымы менен чыгарылган бул сот чечимин кабыл албайбыз.

Мындан тышкары радикал исламчылар Асия Бибини жана аны актаган соттордун көзүн тазалоого чакырык ташташкан. Бул нааразылыктын артында негизинен «Техрик-и-Лабаик Пакистан» партиясы турган.

Жогорку соттун өкүмүнө каршы нааразылык. 8-ноябрь, 2018-жыл.
Жогорку соттун өкүмүнө каршы нааразылык. 8-ноябрь, 2018-жыл.

Ноябрда «христиан аялдын сотто акталышы боюнча кескин чакырыктарды таратты» деген динаятчы, «Техрик-е Лабаик» партиясынын башчысы Хадим Хуссейн камакка алынганы жана анын «Твиттер» социалдык түйүнүндөгү аккаунту жабылганы кабарланган.

- Биздин эч ким менен душмандыгыбыз жок. Болгону пайгамбарга акарат келтиргендерге байланыштуу гана талашыбыз бар. Бардык пакистандыктар, анын ичинде азчылыктар да ынтымакта жашашы керек. Бирок азчылык азчылыктай болушу зарыл, - деп билдирген партиянын лидери Хадим Хуссейн камакка алынганга чейин.

Өлкөдө курчуган кырдаалга байланыштуу бийлик ноябрда тарса аял боюнча Жогорку соттун акыркы чечимин кайра дагы бир жолу кароого макул болгон.

«Техрик-и-Лабаик Пакистан» партиясынын өкүлдөрү 28-январдагы билдирүүсүндө христиан аялды актаган кандай гана чечим болбосун кабыл албай турганын жарыялап, жаңы акцияларды өткөрүүгө камынып жатышканын кабарлашты. 29-ноябрда ишти кароо учурунда полиция Исламабаддагы Жогорку сот жайгашкан аймакта коопсуздук чараларын күчөттү.

Христиан динин тутунган Асия Биби өзүнүн күнөөсүз экенин айтып келе жатат. Ал соттук териштирүү бүтүп, абактан чыкса эле Пакистандан кете турганын билдирген. Анын күйөөсү Батыш мамлекеттерине алардын үй-бүлөсү үчүн баш паанек берүүнү сурап кайрылууга мажбур болгон. Анын кыздарына Канада качкын макамын берген.

Опуза күчөгөндө тарса аялдын адвокаты да Пакистандан чыгып кетип, кийин эл тынчыганда гана кайра кайтып келген.

Асия Бибинин укугун коргогон адвокат Сайфулла Мулк.
Асия Бибинин укугун коргогон адвокат Сайфулла Мулк.

Бир катар Батыш мамлекеттери жана эл аралык уюмдар Исламабадды Асия Бибини бошотууга жана анын үй-бүлөсүнүн коопсуздугун камсыз кылууга үндөшкөн.

Пакистанда «исламга акарат келтирген» деп айыпталгандар өлүм жазасына тартылат. Айрым учурларда айың кептерге эле таянган адамдар шектүүлөрдү сотсуз ташбараңга алган учурлар кездешет. АКШнын Эл аралык диний эркиндик комиссиясынын 2018-жылдагы баяндамасына караганда, Пакистанда «динди маскаралаган» деп өлүм жазасына тартылган же өмүр бою соттолгон 40тай киши камакта отурат. Пакистандын 200 миллионго чукул калкынын 1,6% тарса-христиандар түзөт.

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.

Пикирлерди көрүңүз (8)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG