Линктер

дүйшөмбү, 20-август, 2018 Бишкек убактысы 00:11

Куралды көзөмөлдөө чакырыгы дагы жаңырды


Курал сатылуусуна көзөмөлдү күчөтүүнү талап кылгандардын акциясы. Флорида, 17-февраль, 2018-жыл.

АКШнын Флорида штатында өткөн аптадагы кол салуунун арты кайрадан куралды көзөмөлдөө боюнча талкуулар, бийликти чара көрүүгө чакырган демонстрациялар менен коштолду. Ал эми кол салуудан аман калган окуучулар келерки айда Вашингтонго жүрүш жасоо планын жарыялашты. Алар муну менен бийликти курал мыйзамын катаалдаштырууга мажбурлоону көздөп жатышат.

Флорида штатынын Парклэнд шаарында өткөн аптада он жети кишинин өмүрү кыйылган кандуу окуянын артынан 18-февралда болгон демонстрацияга миңдеген адамдар: ата-энелер, жергиликтүү тургундар, студенттер, окуучулар да катышты.

Алар бийликтен АКШда курал-жарактын сатылышын көзөмөлдөө мыйзамын катаалдатууну талап кылып жатышты:

- Достордун, үй-бүлөлөрдүн, туугандардын, коңшулар менен жамааттын дубасын жана ой-тилектерин кабыл алабыз. Ал эми саясатчылардын ой-жоруму менен дубасына эмес, чара көрүүсүнө муктажбыз, - деди демонстранттардын бири Эмма Гонзалес.

Нааразылык акциялардын жүрүшүндө кол салуудан курдаштарын жоготкон мектеп окуучуларынын айрымдары көзгө жаш алып сүйлөп жатышты.

Демонстрацияда президент Дональд Трамптын жана башка саясатчылардын дарегине шайлоо өнөктүгүндө курал лоббисинен каржылык жардам алышат деген айыптоолор да айтылды.

АКШда жарандардын Конституцияда каралган укугу - куралга ээлик кылууну жактагандар – Улуттук курал ассоциациясы деген топко биригишкен.

Федералдык тергөө бюросу - ФБРдин иликтөөсү 14-февраль күнү Флоридада мектепке келип ок аткан он тогуз жаштагы Николас Круз мандемдүү жүрүм-турумуна карабай куралды мыйзамдуу сатып алганын көргөзгөн.

Николас Круз сотко алынып келинген учур. 19-февраль, 2018-жыл.
Николас Круз сотко алынып келинген учур. 19-февраль, 2018-жыл.

ФБР азыр камакта отурган Круз боюнча ал адамдарды массалык атууну пландап жатышы мүмкүн деген маалыматтар январь айында түшкөнүн, бирок агенттери тийиштүү чара көрбөгөнүн моюнга алды.

Вице-президент Майк Пенс бийликтин дарегине багышталган чакырыктар менен сындарга жооп берип жатып буларга токтолду:

Майк Пенс.
Майк Пенс.

- Мен сиздерге убада берем. Азыркы президент жана бүткүл администрация бул окуяны тергөө учурунда алынган башкы сабактарга, мектептерди коопсуз кылууга олуттуу көңүл бурат. Укук коргоо органдары менен жергиликтүү бийликке психикалык илдети бар, коркунучтуу адамдар менен күрөшүү үчүн зарыл мүмкүнчүлүктөрдү берет.

Куралды көзөмөлдөө АКШда күн тартибинде узактан бери турган маселе. Анын сатылуусун тескеген мыйзамды катаалдаштыруу демилгелери ар бир кандуу окуядан кийин көтөрүлөт.

Коннектикут штатынан шайланган демократ сенатор Крист Мерфи демилгенин турмушка ашпай жатканы үчүн Конгрессти күнөөлөдү:

- Мындай нерсе АКШдан башка жерде болбойт. Бул массалык өлтүрүүнүн эпидемиясы. Мектеп артынан мектепке ок атылып жатат. Бул кокустуктун, жолу болбогондуктун эмес, биздин чара көрбөгөнүбүздүн кесепети. Буга биз жоопкербиз.

Статистика боюнча Кошмо Штаттарда куралдын эркин сатылышына байланышы бар окуялардан жылына отуз миңден ашуун адамдын өмүрү кыйылат.

Куралга көзөмөлдү күчөтүүгө чакырган окуучулар, студенттер. Флорида, 17-февраль, 2018-жыл.
Куралга көзөмөлдү күчөтүүгө чакырган окуучулар, студенттер. Флорида, 17-февраль, 2018-жыл.

Everytown for Gun Safety (Ар бир шаарча курал коопсуздугу үчүн) деген уюмдун эсебинде, быйыл АКШнын мектептеринде он сегизинчи ирет ок атылды.

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.
  • 16x9 Image

    Улан Алымкул уулу Эшматов

    "Азаттыктын" Прагадагы кеңсесинин кызматкери, журналист, саясат жана экономика тармактары боюнча адис. Кыргыз улуттук университетинин журналистика факультетин аяктаган.

XS
SM
MD
LG