БИШКЕК. 27-февралда Улуттук банктын эмгек жамааты президент Курманбек Бакиевге ачык кат жолдошту. Анда Улуттук банктын төрагасы Улан Сарбановду сот жараяны аяктаганга чейин кызматтан убактылуу четтетилсин деген Биринчи май райондук сотунун токтомуна каршы пикирин билдиришкен. Улуттук Банктын жамааты иштин обьективдүү каралышын жана мыйзамдуулуктун сакталышын камсыз кылуу максатында, соттук териштирүүнүн жүрүшүн жеке көзөмөлдүккө алууну суранып Конституциянын гаранты катары президент Курманбек Бакиевге кайрылышкан.
