Бишкекте кыргыз адабиятынын классик акыны Алыкул Осмоновдун түрк тилинде жарык көргөн "Мен кыргыздын акыны" аттуу китебинин бет ачар аземи өттү. Иш-чараны Кыргыз-Түрк "Манас" университети, ТҮРКСОЙ түрк маданиятынын эл аралык уюму, Кыргызстандын Түркиядагы элчилиги уюштурду.
Алыкул Осмоновдун түрк тилинде биринчи жолу жарык көргөн тандалма ырлар жыйнагын акын Кожогелди Култегин түзүп, басмага даярдаган. Чыгармаларды түрк акындары Кенан Чарбога, Ибрагим Түркхан которгон.
Китептин баш сөзүн жазган ТҮРКСОЙ уюмунун Баш катчысы Дүйсен Касеинов Алыкул Осмоновду түрк дүйнөсүндөгү Габдулла Тукай, Магжан Жумабаев, Микаил Мушфиг, Жахит Сыткы Таранжы сыяктуу аз өмүр жашап, анткен менен, улуттук адабияттын классиги катары даңазаланган акындардын катарында экенин белгилеп, китепти түрк тилинде чыгаруу аркылуу Алыкул менен сыймыктануу салты эми түрк дүйнөсүндө уланса деген тилегин билдирген.
Жыйнак 30-сентябрда Алыкул Осмоновдун быйылкы 100 жылдыгынын алкагында Анкара шаарында басылып чыккан. (ZA)
