Линктер

ЧУКУЛ КАБАР!
3-декабрь, 2020 бейшемби, Бишкек убактысы 10:30

Жамал Хашогжини өлтүрүүгө шектүүлөргө акыркы өкүм чыкты


Жамал Хашогжинин сөөгү эмгиче табыла элек.

Сауд Арабиясында журналист Жамал Хашогжини өлтүрүүгө катышкан деген шек менен камалгандарга акыркы сот өкүмү чыкты. «Al Arabia» телеканалы анда беш адам 20 жылга түрмөгө кесилип, дагы үчөө жети жылдан он жылга эркинен ажыратылганын маалымдады.

Ушул жылдын май айында журналисттин үй-бүлөсү Хашогжини өлтүргөндөрдү кечирген. Падышалыктын мыйзамдарына ылайык, мындай учурда оор кылмышка айыпталгандарды өлүм жазасына тартууга болбойт.

Түркияда сот июль айынан тартып Хашогжинин киши колдуу болушуна байланыштуу ачылган ишти карай баштаган. Анкара бул факт боюнча 20 адамга айып койгон жана алардын арасында Сауд Арабиясынын мураскор ханзаадасы Мухаммед ибн Салмандын мурдагы кеңешчиси да бар экени айтылган.

«The Washington Post» басылмасы менен кызматташып келген Хашогжи 2018-жылы октябрь айында Стамбулдагы Саудиянын консулдугунда өлтүрүлгөн. Ошол убактарда ал Эр-Рияддын саясатын кескин сындап жүргөн.

Сауд Арабиясы Хашогжи консулдукта өлтүрүлгөнүн бир нече жумадан кийин гана моюнга алган. Анын сөөгү ушул күнгө чейин табыла элек. Түркия Эр-Рияддагы бийликтин жогорку эшелонун «журналистти жок кылууга буйрук берген» деп айыптаган, падышалык бул дооматты четке каккан.

Эл аралык коомчулук Эр-Рияддан журналисттин өлүмүн ачык, калыс иликтөөнү талап кылып келет.

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG