Сокулук районуна караштуу Шопоков шаарындагы үйлөрдүн биринен өрт чыгып, төрт адам иске ууланды. Арасында карыя киши жана балдар бар. Өзгөчө кырдаалдар министрлигинин (ӨКМ) маалыматына караганда, өрт 11-январда түндө чыгып, батирдин 10 чарчы метри күйгөн. Түтүнгө ууланган төрт адам: 90 жаштагы карыя, 45 жаштагы эркек киши, 15 жана 12 жаштагы эки кыз ооруканага жеткирилген. Дагы сегиз адам коопсуз жакка эвакуацияланган.
11-январда Кыргызстандын ар кайсы аймактарында 12 өрт катталган. Көпчүлүк учурда өрт кырсыктарына кургак чөптүн күйүшү, балдардын от менен ойногону себеп болгонун ӨКМдин басма сөз кызматы кабарлады.
1-январь түнү Сузак районунун Кашка-Терек айылында көмүр исине ууланып төрт адам: 30 жаштагы келин, анын тогуз жаштагы жана төрт жаштагы эгиз уулдары каза болгон.
Декабрь айында Нарындын Кочкор районунда иске ууланып төрт киши: келин үч кызы менен кошо көз жумган. Беш жаштагы уулу аман калган. (ZKo)
