Линктер

ЧУКУЛ КАБАР!
6-Март, 2021 ишемби, Бишкек убактысы 08:01

Кыргызстан менен Тажикстан чек арада кармалган жарандарын кайтаруу маселесин сүйлөштү


Кыргыз-тажик жолугушуусу. Лейлек району. 22-февраль, 2021-жыл.

22-февралда Баткен облусунун Лейлек районундагы Борбордук-Арка (Хожент-Канибадам) жолунун боюна жайгашкан ресторанда эки тараптын өкүлдөрү жолугушту.

Жолугушууга Кыргызстандын Лейлек, Тажикстандын Гафуров райондорунун акимдери, прокурорлору, милиция, коопсуздук жана чек ара кызматтарынын аймактык жетекчилери катышты.

Өкмөттүн Баткен облусундагы өкүлү Өмүрбек Суваналиев "Азаттык" радиосуна чек араны мыйзамсыз бузуп кармалган кыргызстандык тогуз жаранды, Кыргызстанда да ушундай себеп менен кармалып турган тажикстандык 15 жаранды мекенине кайтаруу маселеси талкууланганын билдирди.

"Сүйлөшүү болуп өттү. Жыйынтыгын күтүп жатабыз. Бул шыр эле чечиле калчу маселе эмес. Чек арадагы айрым маселелерди чечүүдө элдик дипломатияны да колдонуу керек", - деди Өмүрбек Суваналиев.

Мындан тышкары ынтымакты күчөткөн иш-чараларды өткөрүү тууралуу да сөз болгон.

Жолугушуу кыргыз тараптын демилгеси менен өттү.

Лейлек районундагы Борбордук-Арка (Хожент-Канибадам) жолу Кыргызстан менен Тажикстандын чек арасында, эки өлкө ортосунда жайгашкан.

22-февралда Баткенде облустук акимчиликтин алдына жүздөй киши чогулуп, түрдүү себептер менен Тажикстанда кармалып турган туугандарын бошотуп берүүнү облустук бийликтен талап кылышкан.

Алар жыйырмадан ашуун кыргызстандык жаран "чек арадан мыйзамсыз өткөн", "аткезчилик менен товар ташыган" деген негизде Тажикстанда кармалып турганын айтып чыгышкан.

Анда облустагы өкмөттүн өкүлү Өмүрбек Суваналиев 16-февралда кармалган кыргызстандыктарды алып келүү боюнча чара көрүп жатканын билдирген.

Улуттук коопсуздук боюнча мамлекеттик комитет 16-февралда Кыргызстандын беш жараны Тажикстандан 900 кг металлды, эки бодо малды, үч койду мыйзамсыз чыгарып бара жаткан жеринен тажик чек арачылары тарабынан кармалганын маалымдаган.

Алардын ичинен эки адамдын үстүнөн Тажикстандын күч кызматтары тергөө иштерин жүргүзүүдө. Учурда кыргызстандык жарандарды кайтаруу максатында тажик бийлиги менен сүйлөшүүлөр жүрүп жатканы кабарланган. (ZKo)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG