Ош облусу
Араван райондук ооруканасында 40 жылга чукул эмгектенген атактуу хирург, мыкты дарыгер Журавой Акимжанов 24-июлда өзү иштеген ооруканада коронавирустан улам каза болду. Анын артында ондогон шакирттери, үч уулу жана аялы калды. «Саламаттык сактоонун мыктысы» төш белгисинин ээси Акимжановду анын жакындары, кесиптештери эскеришет.
Ош шаарында коомдук транспортту каттамдан кийин тазалоо, зыянсыздандыруу иштери уланууда. Ош шаардык муниципалдык автоунаа мекемесинин сүрөт, видеолорун көрүңүз:
Өкмөттүн Ош облусундагы ыйгарым укуктуу өкүлүнүн милдетин аткаруучу болуп Байыш Юсупов дайындалды. Тиешелүү буйрукка өкмөт башчы Кубатбек Боронов кол койгонун өкүлчүлүктүн «Фейсбуктагы» баракчасына жарыяланды. Юсупов 2013-жылдан бери облус жетекчисинин биринчи орун басары болуп эмгектенген. Өкмөттүн Ош облусундагы өкүлү болуп буга чейин Узарбек Жылкыбаев иштеп келген. Ал 8-августта өз арызы менен кызматтан кеткени белгилүү болгон. Маалыматка караганда, Жылкыбаевдин кызматтан кетиши анын алдыдагы парламенттик шайлоого катыша турганы менен байланыштуу.
Ошто күйдүргү чыккан айылга карантин жарыяланды
Кара-Суу районунун Папан айыл өкмөтүнө караштуу Тогуз-Булак айылынын сегиз тургуну күйдүргүгө (Сибирь жарасы) кабылган деген шек менен ооруканага түштү. Учурда айыл 4-августтан 18-августка чейин карантинге алынып, мал алып кирип-чыгуу токтотулду. Бул тууралуу Папан айыл өкмөтүнүн башчысы Курбанбек Мияшев билдирди.
Анын айтымында, ооруканага түшкөн сегиз киши элге таратылган малды союуга катышкан. Ал эми союлган уйдун этин 288 киши жеген.
Алайда 31 жаштагы милиционер пневмониядан каза болду
Алай райондук ички иштер башкармалыгынын кызматкери Азамат Сыдыков 9-августта пневмониядан каза болду. Бул тууралуу Ош облустук ички иштер башкармалыгынын басма сөз кызматы билдирди.
Облустук ички иштер башкармалыгы жана Алай райондук ички иштер бөлүмүнүн эмгек жамааты маркумдун дүйнөдөн мезгилсиз кайтканына байланыштуу үй-бүлөсүнө жана жакындарына көңүл айтышты.
Азамат Сыдыков 1989-жылы Кара-Кулжа районунун Алайкуу өрөөнүндө, Кызыл-Жар айылында туулган. Милицияда 2010-жылдан бери иштеп келе жаткан.
Маркумдун артында бир уул, бир кызы калды.
Кыргызстанда аңчылыкка уруксат берилди
Август айынын экинчи ишембисинен тартып кулжага, текеге, кийикке, каманга жана айрым канаттууларга аңчылык кылууга уруксат берилди. Аңчылык убактысы октябрь айынын акыркы жумасына чейин созулат.
Айлана-чөйрөнү коргоо жана токой чарбасы боюнча мамлекеттик агенттиктин маалыматына караганда, быйылкы аңчылык мөөнөттө жалпысы 800дөн ашуун кулжа-теке, 60 баш каманды атууга уруксат берилген.
Маалыматка ылайык, учурда Кыргызстандагы тоо-токойлордо 46 миң баш кайберендин түрлөрү, үч миңден ашуун каман эсептелген. Мындан тышкары Кызыл китепке киргизилген Марко Поло, Тянь-Шань жана Северцев аркарларынын саны 16 миңден ашкан.
Ысык-Көл
Ысык-Көлдө жылына жай мезгилинде окуучулардын да жаны тынбайт. Алар туристтик сезондо тапкан акчасын кем-карчына жумшайт. Азирет Азатбеков беш жылдан бери Кара-Ой айылында иштейт. Ал эс алуучуларга күндөн коргоочу чатырды орнотуп берет. Буга кошумча майда-чүйдө сатат. Быйылкы пандемия бул балдардын ишин да солгундатты.
Кыргызстандан чет жакта жашаган журтташтар коронавирус илдети менен күрөшүүгө көмөк көрсөтүүнү улантууда. АКШда эмгектенген кыргызстандыктар каражат чогултуп, акыркы үлгүдөгү рентген аппаратын Ысык-Көл облусуна сатып беришти. Өкмөттүн бул облустагы өкүлү Балбак Түлөбаев бул рентген аппараты Ак-Суу райондук ооруканасына тапшырылганын, муктаждык болсо жалпы облус боюнча колдонула берерин жазды.
Бишкек
Эл аралык каттамдар токтоп, чек аралардын жабылышы «Дордой» базарындагы соодага терс таасир этүүдө. Себеби коңшу Казакстандан, Орусиядан кардарлар келбей калды. Соодагерлер контейнердин ижара акысын чыгара албай соңку эки айды чыгаша менен жыйынтыкташты. Билим берүү мекемелеринин онлайн окууга өтүшү абалды андан да курчутуп жатат.
Бишкек шаарынын мэриясынын санитардык-экологиялык инспекциясы соңку 10 күндө санитардык талаптарды бузуп, массалык иш-чараларды өткөргөн ишкерлерге 80 миң сомго 20 протокол түздү. Бул тууралуу мэриянын басма сөз кызматы билдирди.
Мекеме жакында эле Дэн Сяопин көчөсүндө жайгашкан «Нур-Суфра» тойканасынын администрациясы санитардык эрежелерди сактабай куран окутуу өткөрүп жатканы аныкталганын кабарлады.
Дем алыш күндөрү ушундай эле тартип бузуу «Улуу-Тоо» чайханасында, «Главпивтрест» кафесинде да аныкталды. Андан тышкары компьютердик жана бильярд клубдарында да эреже сакталбаган учурлар катталды.
Эскертүү!
«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.