Линктер

ЧУКУЛ КАБАР!
13-Июнь, 2024-жыл, бейшемби, Бишкек убактысы 21:12

Жакынкы Чыгышта кырдаал курчуду


Газа тилкесинен тартылган сүрөт.
Газа тилкесинен тартылган сүрөт.

7-апрелдин таңында Израил Ливандагы жана Газа тилкесиндеги буталарга сокку урду. Бул артында ХАМАС радикал тобу турат делген ракеталык чабуулдарга жооп экени айтылды. Ага чейин Ливандын аймагынан Израилга 34 ракета атылган эле.

Чыгыштагы кырдаал Иерусалимдеги Ал-Акса мечитиндеги окуядан кийин курчуп кетти. Аймактагы Улуттар Уюмунун тынчтык орнотуу күчтөрү абалды "өтө олуттуу" деп баалап, тараптарды сабырдуулукка чакырды.

Ливандын аймагынан атылган 34 ракетанын 25ин Израилдин абадан коргонуу күчтөрү жок кылып, дагы бешөө ар кайсы районго түшкөнүн Тель-Авив билдирди. Израилдин түндүгүндөгү калктуу аймактарынан ракетанын калдыктары табылды. Расмий органдар эки жаран жаракат алганы кабарланды.

Израил аскерлери Ливандан атылган ракетанын калдыктарын текшерүүдө.
Израил аскерлери Ливандан атылган ракетанын калдыктарын текшерүүдө.

Израилдин жарандык авиация башкармалыгы өлкөнүн түндүгүндөгү аба мейкиндигин бардык жарандык каттамдар үчүн убактылуу жапты.

"Биз жарылуунун жана сиренанын үнүн уктук. Менин үйүмдүн жанынан өтүп бараткан машинага ракета тийип, бирок жарылган жок. Качып кетип, кайра келсем жарадар болгон бир киши бар экен", - деп айтып берген Фассута шаарынын тургундарыны бири Reuters агенттигине.

Ливан тараптан Израилди мындай масштабдуу аткылоо 2006-жылдагы Экинчи Ливан согушунан бери боло элек болчу. Анда Израил армиясы менен Ливандагы радикал “Хизбулла” кыймылынын кагылышуусу бир айга созулган эле.

Израилдин премьер-министри Биньямин Нетаньяху өлкөнүн куралдуу күчтөрү менен чукул жыйын куруп, арессияга жооп кайтарылат деп билдирди.

"Храм тоосундагы абалды өзгөртүүгө аракет кылып жатабыз. Биз кырдаалды жөнгө салууга чакырабыз жана ал жерде зордук-зомбулук көрсөткөн экстремисттерге каршы чечкиндүү чараларды көрөбүз. Башка фронттордогу бизге каршы агрессияга келсек, душмандарыбызга сокку урабыз, агрессия кылгандар жооп берет".

Израил армиясы ХАМАС көзөмөлдөгөн аймактардагы 10 бутага, анын ичинде Ливандын Тир жээгиндеги палестиналык качкындардын Рашидие лагерине жакын жерге чабуул койгонун билдирди.

Ракеталардын бири Ливандагы жай тургундун үйүнө келип тийген. Ливандын расмий өкүлү Reuters агенттигине жабыркагандар жок экенин билдирди.

Ливандын Тир шаарына жакын аймактагы үйлөрдүн бирине Израил ракетасы тийген.
Ливандын Тир шаарына жакын аймактагы үйлөрдүн бирине Израил ракетасы тийген.

"Түндө уктап жатканбыз, күтүлбөгөн жерден катуу үн угулду. Ойгонсок, чатыр үстүбүзгө кулай баштады. Бул жерде менин бир туугандарым уктап жатышкан. Эшикке чуркап чыктык. Тегерегибизде топурак сапырылып, таштар учуп баштады", -деди Израил армиясы аткан ракета тийген үйдүн ээси ​Мадж ал-Омар.

Кабарларга караганда, Газа тилкесинин ар кайсы аймактарында да катуу жардыруулар болду. Анткени Израил ХАМАСтын курал-жарак алып өткөн өтмөктөрүн бутага алганын билдирди.

"Биз ооз ачалы деп жатканбыз. Анан эле үч-төрт жардырууну угуп калдык. Мен дароо эки жаштагы кызымды алып качтым. Эки жакты карасам, бүт талкаланып калыптыр. Машинем да жарабай калды", - деген Газа тилкесинде жашаган тургун.

Израил бутага алган Газа секторун радикал “ХАМАС” кыймылы башкарат. 6-апрелде кыймылдын башчысы Исмаил Хания Ливанга иш сапары менен барган.

Газа тилкеси.
Газа тилкеси.

Жакынкы Чыгыштагы кырдаалдын курчуп кетишине Иерусалимдеги Ал-Акса мечитинин айланасында палестиналыктар менен Израил полициясынын кагылышы себеп болду. Аймактагы Улуттар Уюмунун тынчтык орнотуу күчтөрү абалды "өтө олуттуу" деп баалап, тараптарды сабырдуулукка чакырды.

Куралдуу кармаш мусулмандардын ыйык Орозо айына жана жөөттөрдүн Песах майрамы белгиленип жаткан маалга туш келди.

  • 16x9 Image

    Айбек Бийбосунов

    "Азаттыктын" Бишкектеги бюросунун кызматкери, журналист. 2015-жылы Жусуп Баласагын атындагы Кыргыз Улуттук университетинин журналистика факультетин аяктаган.

     

Facebook шеринеси

XS
SM
MD
LG