Бишкек шаарынын мурдагы мэри Кубанычбек Кулматовдун кызматтан кеткени тууралуу Борбордук шайлоо комиссиясына азырынча расмий маалымдама келе элек. Ошондуктан калаа башчысын шайлоо күнүн белгилөө боюнча чечим качан кабыл алынары белгисиз. Билдирүү келери менен маселе күн тартибине киргизилерин БШКдан "Азаттыкка" кабарлашты.
Кубанычбек Кулматов 9-февралда кызматтан кетүүгө арыз жазып, өкмөт башчынын буйругу менен вице-мэр Айгүл Рыскулова мэрдин милдетин аткара баштады. Мыйзам боюнча жаңы шайлоо он күн аралыгында белгиленип, 20 күн ичинде өтүшү керек. (SE)
