Башкы прокуратуранын маалыматына караганда, Бишкектин Октябрь райондук ички иштер башкармалыгына 26 жаштагы жергиликтүү тургун кайрылып, президенттикке талапкер Өмүрбек Бабановдун штабында шайлоочулардын добушу үчүн акча төлөнүп жатканын маалымдаган. Ал Бабановдун 12-кичи райондогу штабынын координаторлору №2 форма менен добуш топтоонун жана сатып алуунун жолдорун үйрөтүп жатат деген видеотасманы милицияга өткөрүп берген.
Бул ишти Октябрь райондук соту 4-октябрда карайт.
Бабанов үчүн добушка акча сунушталганы тууралуу дагы бир арызга байланыштуу иш 29-сентябрда Октябрь райондук сотуна өткөрүлүп берилген. Анда да, прокуратуранын билдиришинче, Бабановдун үгүтчүсү деген аял ар бир добуш үчүн 1000 сомдон сунуштап жатканы видеотасмага алынып, Фейсбукка жайгаштырылган.
Бабанов 1-октябрда маалымат жыйын куруп, бийлик ага карата "каралоо" уюштуруп жатканын айтып, муну президенттик шайлоонун алдында өзүнүн рейтинги жогорулаганы менен байланыштырган. (ZKo)
