Линктер

ЧУКУЛ КАБАР!
27-Январь, 2021 шаршемби, Бишкек убактысы 16:22

Жапаров Путинден телефон аркылуу сүйлөшүүнү суранып, Кыргызстан Орусиянын ишенимдүү өнөктөшү экенин айтты


ШКУнун саммити. 10-ноябрь, 2020-жыл.

Евразиялык интеграция маселелеринде Кыргызстан Орусия үчүн дайыма ишенимдүү өнөктөш болот. Бул тууралуу 10-ноябрда президенттин милдетин аткаруучу, өкмөт башчы Садыр Жапаров Шанхай Кызматташтык Уюмунун (ШКУ) кезектеги саммитинде сүйлөп жатып орус президенти Владимир Путинге кайрылып айтты.

«Биз эки өлкөнүн ортосундагы экономикалык жана маданий байланыштарды өнүктүрүү багытын ырааттуу негизде улантабыз. Кызматташтык боюнча ортодо бир катар актуалдуу маселелер бар. Мен аларды сиз менен телефон аркылуу талкуулоону суранат элем».

Коронавирус пандемиясына байланыштуу саммит онлайн форматта өтүүдө. Ага ШКУга мүчө мамлекеттердин лидерлери катышып жатышат.

Садыр Жапаров Кыргызстанда 4-октябрдагы парламенттик шайлоодон кийин эл нааразылыгын билдирип чыгып, президент өз эрки менен кызматын тапшырганын, бийлик тынч жана мыйзам негизинде өткөрүлүп берилгенин, азыр өлкөдө абал туруктуу экенин айтты. Кыргызстан бардык эл аралык милдеттенмелерин, эки тараптуу жана көп тараптуу макулдашууларын аткарарын белгилеп, ШКУнун алкагындагы кызматташтык тышкы саясаттагы маанилүү багыттардын бири экенин кошумчалады.

Орусиянын президенти Владимир Путин Кыргызстан үчүн туруктуулук «кийинки жылдары жетишпей жатканын» айтып, «саясатта туруктуулук болбосо социалдык-экономикалык тармакта бир да маселени чечүү мүмкүн эмес» экенин белгиледи жана кызматташтык телефон аркылуу сүйлөшүүдө «сөзсүз талкууланарын» айтты.

Кыргызстан жана Орусия - Евразия Экономикалык Биримдигинин (ЕАЭБ) тең укуктуу мүчөлөрү. Бул уюм 2010-жылы Беларустун, Казакстандын жана Орусиянын Бажы биримдиги катары түзүлгөн. Кийин 2015-жылы Армения менен Кыргызстан кошулган.

Кийинки жылдары ЕАЭБге мүчөлүк Кыргызстанга пайда алып келбегени боюнча пикирлер парламентте айтылып, уюм ичиндеги пикир келишпестиктер тууралуу өкмөт да билдирген. (RK)

Пикирлерди көрүңүз (44)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG