“Улуу көчмөндөр мурасы” улуттук холдингинин жетекчиси Тенгиз Бөлтүрүк холдингдин кен казуу, гидроэнергетика жана башка тармактарда 32 ири долбоорду ишке ашыруу планы бар экенин билдирди. Бул тууралуу ал “Ала-Тоо 24” телеканалына берген маегинде айтты.
“Анын арасында Сары-Жаз ГЭСин куруу да бар. Анын курулушу үчүн бери дегенде 3 млрд. доллар керек. Жетим-Тоо темир кени үчүн бери дегенде 2 млрд. доллар керек. Бала-Чычкан деген кенге да 2 млрд. доллар кетет”, - деди Бөлтүрүк.
Жаңы түзүлгөн “Улуу көчмөндөр мурасынын” уставдык капиталы 10-15 млрд. сомдун тегерегинде болору, президенттин катышуусунда 282 млн. доллардан турган бюджети бекитилгени айтылган.
Министрлер кабинетинин төрагасы Акылбек Жапаров 8-апрелде “Азаттыкка” курган маегинде Кумтөрдөн түшкөн кирише башка кендерди иштетүүгө жумшаларын, арасында Жетим-Тоо темир кени да бар экенин билдирген. Буга байланыштуу Кыргызстанга чет өлкөдөн адистер келгенин маалым болгон.
Садыр Жапаров 2020-жылы премьер-министр болуп турганда Жетим-Тоодо 50 миллиард тоннадай темир кени бар экенин айтып, аны иштетүү ниетин билдирген. Ушундан улам Жетим-Тоону коргоо кыймылы түзүлүп, айрым активисттер кенди иштетүүгө каршы чыгышкан. (BTo)
Facebook шеринеси