Уланбектин иликтөөгө салган чыйыры өчпөйт
"Азаттык" радиосунун таланттуу иликтөөчү журналисти Уланбек Эгизбаевдин мезгилсиз дүйнөдөн кайтканына беш жыл болду. 2018-жылдын каргашалуу 22-июлунда суук кабар кыргыз коомчулугуна желдей тараган. Өлкөдөгү курч, көйгөйлүү маселелерди тайманбастан козгоп, коомго алып чыккан чыгаан журналист Уланбек Эгизбаев көз жумганда 28 жашта гана болчу. Андан кийин Эгизбаев атындагы журналисттик иликтөөлөр фонду түзүлүп, жыл сайын мыкты иликтөөчүгө байге берип келет. Мындан башка да көптөгөн иш-чараларда анын ысымы аталып, эмгеги эскерилип жүрөт.
