Линктер

ЧУКУЛ КАБАР!
28-Январь, 2021 бейшемби, Бишкек убактысы 08:48

Жаш жоокердин сырдуу өлүмү


Бексултан Адылбек уулу.

Ички иштер министрлигинин Ички аскерлеринде кызмат өтөп жатып каза болгон Бексултан Адылбек уулунун сөөгү туулуп өскөн Өзгөн районундагы Кызыл-Октябрь айыл өкмөтүнүн Алга айылында жерге берилди.

21-декабрда Бишкектеги №702 аскер бөлүгүндө болжол менен эртең мененки 5:30 чамасында жоокер асынып калган абалда табылган. Жоокер өзүнө кол салды деген версияга жакындары макул эмес. Анткени алар жоокердин денесинде бир нече тактар болгонун айтып, иликтөө иштери калыс жүргүзүлүшүн суранып жатышат.

Айылы аза күтүүдө...

Адылбек Өсөров тун баласы, аскерден сөөгү келген Бексултанды акыркы сапарга узатып жатат. Үч бир туугандын улуусу, 22 жаштагы Бексултан Бишкек шаарында жогорку окуу жайын бүтүрүп, быйыл күзүндө армияга кеткен. Арадан үч ай өткөндөн кийин анын сөөгү кайтып келиши тууган-урук менен кошо айылды да кайгыга салды.

Маркумдун атасы Адылбек Өсөров интервью бере турган абалда эмес экенин айтты. Ал эми таежеси Гүлмира Артыкова буларды айтып берди:

«Окууну бүткөндөн кийин «апа, мен армияга барып келбесем ишке албайт. Азыр мыйзам ушундай» деп, «ошол жактан да билим алып келейин» деп кетти. Болгону үч ай болду, баланын өлүгү келди, бул эмнеси, ботом?! Азыр атасы менен апасы сүйлөй албайт. Себеби оор абалда».

Маркумдун жакындары сөөктү жууган учурда анын денесиндеги тактарды көргөнүн айтышты. Мындан сырткары анын жамбашынан да тигилген жерлерин көрүшкөн. Маркум жоокердин аталаш тууганы Азамат Исаков иниси өз жанын кыйганына ишенбей турат. Ал бул окуя калыс иликтенишинен үмүт кыларын айтты:

«Бул баланын асынып өлгөнүнө ишенбей турабыз. Өзүн асып алгыдай жеңил ойлуу бала эмес болчу. Биз ишенбей турабыз, дагы тактайбыз, бирок күнөөлүүлөр жооп бериши керек».

Бексултан Адылбек уулунун окуясы - Ички иштер министрлигине караштуу ушул эле аскер бөлүгүндө быйыл катталган экинчи өлүм. Жыл башында да бул аскер бөлүгүндө 20 жаштагы жоокердин асылып турган сөөгү табылган.

Ички иштер министрлигинин Ички аскерлер бөлүгүнүн басма сөз кызматынын өкүлү Азамат Оторбаев Бексултан Адылбек уулунун өлүмү Кылмыштар менен жоруктардын бирдиктүү реестрине катталганын жана иликтөө иштерин Аскер прокуратурасы алып барып жатканын билдирди:

«Бул боюнча Бишкек гарнизондук аскер прокуратурасына кабарланган. Ал жактан келип сотко чейинки териштирүү иши башталып, бирдиктүү реестрге катталды. Азыркы учурда бул боюнча тергөө ишин Бишкек шаардык аскер прокуратурасы алып барып жатат. Алардын жыйынтыгы чыкмайынча биз эч нерсе дей албайбыз».

Маркумдун агасы Мамлекеттик чек ара кызматын сындаган

Маркум Бексултан Адылбек уулунун аталаш тууганы, офицер Бекболот Исаков өткөн жумада Ош шаарында «Нур» телеканалында журналисттерге басма сөз жыйынын өткөрүп, Мамлекеттик чек ара кызматындагы жетекчилерди сынга алган. Ага жооп катары Мамлекеттик чек ара кызматы Бекболот Исаков аскер тартибин толук сактабаганы үчүн кызматтан алынганын кабарлаган. Эки окуянын бири-бирине байланышы бар-жогу азырынча белгисиз.

Укук коргоочу Азиза Абдирасулова аскердеги кылмыштар кылдат иликтенбей, бир жактуу гана каралып жаткандыктан жоокерлердин өлүмү уланып жатканын айтууда. Мындан сырткары Аскер прокуратурасын да «чабал иштейт» деп сынга алды:

«Аскер прокуратурасы чабал иштейт, убагында барып жеринде иликтебейт, «суицид» деп коюшат. Балким аны суицидге жеткирген жагдайлар болгондур, ал терең иликтенбейт».

Кыргызстандагы адам укугун коргоочу уюмдары армияда адам укуктары сакталбайт деп сындап келишет. Укук коргоочулар армияда аскерлер арасында чоңсунуу, зомбулук, уруп-сабоо көп экенин белгилешүүдө.

2019-жылы 13 аскер кызматкери өзүн-өзү өлтүрсө, 2018-жылы 17 аскер кызматкери суицидге барган.

Армия азабына кабылгандар
please wait

No media source currently available

0:00 0:31:24 0:00

  • 16x9 Image

    Маратбек Акимбек уулу

    Маратбек Акимбек уулу "Азаттыктын" Оштогу кабарчысы. ОшМУнун кыргыз филология жана журналистика бөлүмүн аяктаган. Президенттин алдындагы башкаруу академиясынын магистранты. 

Пикирлерди көрүңүз (12)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG