Линктер

ЧУКУЛ КАБАР!
15-август, 2020 ишемби, Бишкек убактысы 05:02

Изилдөө: Мигранттар эрежени так сакташат


Беткапчан мигранттар каттоосун узартуу үчүн Санкт-Петербургдагы миграциялык кызматта кезек күтүп турушат. 3-апрель, 2020-жыл.

Коронавирус эпидемиясы учурунда москвалыктарга караганда эмгек мигранттары кыйла тартиптүү экенин көрсөттү.

Коронавирус эпидемиясы учурунда москвалыктарга караганда эмгек мигранттары кыйла тартиптүү экенин көрсөттү. Борбор Азия өлкөлөрүнөн келген мигранттар өзүн өзү чектөө режимин тагыраак сактап, оорунун белгисин байкагандар "Тез жардам" кызматын көбүрөөк чакырышкан.

Пандемияга чейин Өзбекстандан келген Муслим Москвада нан бышыруучу цехте иштечү. Карантиндин айынан чех жабылып калган. Орусиядагы миңдеген мигранттар сыяктуу эле Муслим да жумушсуз, кирешесиз калды. Бирок ал орус өкмөтүнүн талабын так сактап, үйдөн бейчеки чыкпай отурганга аракет кылган. Ал бөөдө айыппулга жыгылуудан жана депортация болуп кетүүдөн сырткары, илдетти жуктуруп алуудан да сактанганын жашырбайт.

"Ден соолукту сактоо керек. Анын үстүнө биз бул жерде конокпуз. Бизге ашыкча көйгөйдүн кереги жок. Кайдан-жайдан келип алып, ушулар маселе жаратып атат деген сөздүн да кереги жок", - дейт Муслим.

Мигранттар коомдук жайларда полиция өзгөчө көңүл бургандыктан эрежелерди так сактоого аргасыз экенин жашырышпайт. Маселен, Москва метроcунда полиция көбүнчө Борбор Азия өлкөлөрүнөн келген мигранттарды гана токтотуп, айыппул жазары эч кимге жашыруун эмес.

Төмөнкү видеодо беткап тагынбаганы үчүн полиция мигрант аялга айыппул жазып жатат. Ошол эле учурда беткапсыз эле жүздөгөн киши алардын жанынан беймарал өтүп жатышат.

"Эгер мени токтотсоңуз, баарын тегиз токтотуңуз! Кирип аткандардын баарын токтотуңуз! Тиги кыз маскасыз кирип келатат. Эмне үчүн аны токтотпойсуз?" ,- деп чырылдайт полицияга кармалган мигрант аял.

COVID-19: Орусияда мигранттар тартиптүүлүктү көрсөттү
please wait

No media source currently available

0:00 0:13:02 0:00


Орусиянын Айыл чарба академиясынын иликтөөчүлөрү Москвадагы эмгек мигранттарынын карантин учурундагы жүрүм-турумуна байкоо салышкан. Алар мигрантафобдор арасында кеңири жайылган пикирлердин чын-төгүнүн аныктап көрүүнү чечишкен.

Илимий кызматкер Евгений Варшавер изилдөөнүн жыйынтыгы жергиликтүүлөр арасында кеңири тараган пикирлер туура эмес экенин ачык көрсөткөнүн айтат. Мисалы мигранттар карантин тартибин бузмак турсун, баары биригип, колдоого муктаждарга жардам уюштурган. Бул ыкма аларды көчөдө калуудан, ачкачылыктан сактап калды. Андан сырткары мигранттар орус өкмөтүнүн талабын жергиликтүүлөргө караганда жакшыраак сакташкан.

"Карантин учурунда жергиликтүүлөргө караганда мигранттар көбүрөөк зыянга учурады. Жумушсуз, кирешесиз калышты. Ал эми карантин учурунда жергиликтүүлөргө караганда мигранттар чектөөлөрдү так сакташты", - деп белгиледи иликтөөчү.

Адистер изилдөөнүн соңунда эгерде коронавирустун экинчи толкуну уланса, мигранттарды өз учурунда мекенине жиберүү туура болот деген тыянакка келишкен. Алар иликтөөнүн корутундусун сунуш иретинде орус бийлигине жолдошкон. Бул үчүн мигранттар келген өлкөлөрдүн бийлиги менен тыгыз иштешүүгө кеңеш беришкен.

«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.
XS
SM
MD
LG