Ырысбай Абдыраимов

Октябрь 29, 2005

ЖАЛАЛАБАТТЫК АЯЛДАРДЫН ТАЛАБЫ

29-октябрда Жалалабат облустук бийлигинин имаратынын алдында тынчтык митингин өткөргөн аялдар саясий оюндарды токтотууну, өлкөдө тынч эмгектенип-жашоого жетиштүү шарт түзүүнү жана коррупцияны азайтып, эл-жерге бөлүнүүчүлүктү токтотуп, аялдарды өкмөт иштерине тартууну талап кылышты. Алар кылмыш дүйнөсүнүн бийлик чөйрөлөрүнө үстөмдүк кылуусун сынга алышып, парламент депутаттарынын шайлоо алдындагы убадаларын унуткандыгына нааразы болушту.

Октябрь 26, 2005

АКСЫ КӨЙГӨЙЛӨРҮ

Аксы районунда жумушсуздук менен жакырчылык өтө күчтүү. Тоо бөлүгүндөгү жарандарга бир сотыхка жетпеген, жери тегиз айылдарда 5 сотыхка чейин үлүш тийген. Жумушсуздук менен жакырчылыктын айынан атуулдардын көпчүлүгү Бишкекке жана Орусия менен Казакстанга кетүүдө. Таза суу жана сугат суусу да жетишпейт. Коңшу Өзбекстан менен чек ара проблемалары арбын. Райондук бийлик көйгөйлүү проблемаларды чечүүдө аракеттер көрүлүп жаткандыгын билдирди.

Октябрь 22, 2005

ОРУС ТОКОЙЛОРУНДА КЫРГЫЗ АТУУЛДАРЫНЫН МҮРЗӨЛӨРҮ КӨБӨЙҮҮДӨ

Жашоо-турмуштун оордугунан жүз миңдеген кыргызстандыктар Орусия Казакстан өлкөлөрүндө иштешип, түрдүү укук бузууларга туш болуп жатканы айтылып келет. Иш таппай көчөдө калып, дайынсыз жоголгондору же бөтөн жерде каза тапкандары да аз эмес. Жалалабат облусунда болгон тышкы жана ички миграция проблемаларын талкуулаган бейөкмөт уюмдардын талкуусунда мамлекеттер аралык келишимдер иштебей, эмгек мигранттарын легалдаштыруу маселеси кыйындыгы, чет өлкөлөрдө иштеген кыргызстандыктардын укугу корголбой жаткандыгы белгиленди.

Октябрь 17, 2005

АКСЫЛЫКТАР ПРЕЗИДЕНТТИ ЧАКЫРУУДА

Аксы аймагынын жашоочуларынын Азимбек Бекназаровдун башкы прокурорлук кызматтан алынгандыгына байланыштуу нааразылыгы басыла элек. Алар андан сырткары президент Курманбек Бакиевдин Аксыга келүүсү менен Карасуу базарындагы окуяларды адилет иликтенүүсүн талап кылышууда.

Октябрь 02, 2005

АКСЫ ОКУЯСЫНДА ЖАБЫР ТАРТКАНДАРГА МАМЛЕКЕТТИК ЖАРДАМ КАЧАН БЕРИЛЭЭРИ ДАЛЕ БЕЛГИСИЗ

Аксы окуясында шейит кеткен алты бала менен окуя учурунда ок тийип, милициядан токмок жегендерге мамлекеттик компенсация төлөө жөнүндө Жогорку соттун чечими чыккан. Бирок азырга дейре анын качан төлөнөөрү белгисиз. Баласынан айрылган ата-энелер менен жарадар болгондордун көпчүлүгү жумушсуз. Октон жараат алгандар ишке жарабайт. Жергиликтүү уюмдардан да аларга камкордук көрүлбөй калган.Токмок жегендердин айрымдары ден соолугун калыбына келтирүүгө каражаты жок.

Сентябрь 30, 2005

ПРЕЗИДЕНТТИК АДМИНИСТРАЦИЯ ПАРА АЛАБЫ?

Коомчулукта кыргыз бийлиги коррупциядан арыла албай жатат, кадр саясатында кемчилик кетирүүдө деген нааразы пикирлер жок эмес.Байкочулардын баамында, азырынча өлкөдө өзгөрүүлөрдүн белгиси байкалбайт. Кадр тандоо маселеси мындан ары кандай жүрөт? Президенттик администрацияда паракорчулук барбы? ЖалабатЫрысбай Абдыраимовдун ушул жана башка суроолоруна Президенттик администрациянын башчысы Үсөн Сыдыков Жалабат облусуна барган учурунда аймактагы кабарчыбыз ага ушул өңүттөгү суролорду узатып, кепке тартты.

Сентябрь 25, 2005

ЖАЛАЛАБАТТЫКТАР ӨЗБЕКСТАНДЫН КЫРГЫЗ ТАРАПКА БОЛГОН ДООМАТТАРЫН ЧЕКТЕ КАГУУДА

Учурда Ташкенде Анжиян окуялары боюнча сот жараяны жүрүп жатканда Өзбекстандын баш прокурорунун орунбасары Анжиян коогасына Кыргызстанда даярдалган «Хизб-ут Тахрир» партиясы катышкандыгы жана андан мурда курал-жарак Кыргызстанда сатылып алынганын айтып чыккан. Мындай пикир менен Жалалабат облусундагы жашыруун партиянын өкүлдөрү жана чыр-чатактардын алдын алуу боюнча иштеп жүрүшкөн эл аралык уюмдардын өкүлдөрү макул эмес.

Сентябрь 21, 2005

АКСЫДА БЕКНАЗАРОВДУ КОЛДОГОН МИТИНГ ӨТТҮ

21-сентябрда Жалалабат облусунун Аксы районундагы Каражыгач айылында Азимбек Бекназаровдун башкы прокурорлук кызматтан четтетилишине каршы митинг болуп өттү. Ага райондун тоо бөлүгүндөгү 5 айыл өкмөттүн өкүлдөрү жана президенттин түштүк аймагындагы өкүлү А.Матубраимов менен облустун губернатору Ж. Жээнбеков катышты. Нааразылык акциясында президент К.Бакиевге, өкмөт башчы Ф.Куловго жана башка жетекчилерге кайрылуу кабыл алынды.

Сентябрь 16, 2005

АЗИМБЕК БЕКНАЗАРОВ: “ӨЛКӨГӨ ТАРТИП ОРНОТЧУ МЕЗГИЛ КЕЛДИ”

Өлкөнүн Башкы прокурору Азимбек Бекназаров Жалалабат облусунда болгон учурда “Азаттыктын” кабарчысына экс-президент Аскар Акаев менен анын үй-бүлөсүнө жана экс-өкмөт башчы Николай Танаевге байланыштуу жүргүзүлүп жаткан кылмыш иштеринин абалы тууралуу айтып берди. Башкы прокурор өлкөдөгү абалга да токтолуу менен ички тынчтыкты бузууга март ыңкылабына каршы адамдар түрдүү аракеттерин көрүп жаткандыгын билдирди. Мындан сырткары Аксы окуясына байланыштуу маселелер жөнүндө да сөз болду.

Сентябрь 11, 2005

АК ПАХТА ҮМҮТ АКТАЙБЫ?

Жалалабат облусунун дыйкандары пахта өстүрүүдө быйыл да кыйла кыйынчылыктарга туш болушту. Пахтачылар үчүн өкмөттөн эч кандай жардам болгон жок. Баасы да арзан болгондуктан пахтачылардын быйылкы мээнети да акталбай тургандай.

Сентябрь 03, 2005

МАЙЛУУСУУДАГЫ УРАН КАЛДЫКТАРЫНЫН КОРКУНУЧУ

Майлуусуу шаарында 1947-1966-жылдар аралыгында байытылган урандар менен Жапония, Германия жана Чехия өлкөлөрүнөн ташылып келинген уран калдыктары шаардын атына уйкаш дарыянын жээк-бойлоруна көмүлгөн. Шаарда жер көчкү жана суу ташкыны жүргөн сайын Фергана өрөөнүнө залалын тийгизүүчү уран калдыктары коомчулукту кооптонтот. Анткени урандын сарыккан суулары дарыяга агып түшүп, Кыргызстан, Өзбекстан,Тажикстан аркылуу жүрүп олтуруп, Сыр дарыяга жетүүсү ыктымал.

Август 15, 2005

ЖАЛАЛАБАТ ПАХТА ЗАВОДУНУН ЖУМУШЧУЛАРЫ НААРАЗЫЛЫККА ЧЫГЫШТЫ

15-августта Жалалабат пахта заводунун эмгек жамааты нааразылык иш-чарасын өткөрүштү. Жыйында мурда жылына 70 миң тонна пахта иштеткен заводдун соңку жылдары кубаттуулугу андан 15 эсе азайып кеткен өндүрүштүк мекеменин бүгүнкү абалына, иш билги адистердин жумуштан айдалып, ишкананын таланып-тонолгонуна нааразылык билдирилди.

Август 08, 2005

ЖАЛАЛАБАТТЫК ПОЧТОЧУЛАР НААРАЗЫ

«Кыргызпочта» ишканасынын Жалалабат облустук башкармалыгында нааразылык акциясын өткөрүшкөн Жалалабат шаардык почта түйүнүнүн кызматкерлери айлык акыларынын өтө аздыгы менен социалдык шарттардын түзүлбөгөндүгүнө капа болушту. Алардын айтымында, почта кызматы кирешелүү болсо да, байланыш имараттарына камкордук көрүлбөйт, жол каражаттары төлөнбөй, өтпөгөн гезит-журналдарды сатууга мажбурлашат

Август 03, 2005

ЗАФАР ХАКИМОВ: “КЫЛМЫШКЕР ДЕЛГЕН КАЧКЫНДАР АЗЫРЫНЧА ӨЗБЕКСТАНГА БЕРИЛБЕЙТ”

Жалалабатка келген тышкы иштер министрлигинин миграция боюнча департаментинин деректири Зафар Хакимов аймактагы кабарчыбыздын Оштогу убактылуу тергөө абагында жаткан өзбек качкындарынын тагдырына байланышкан суроолоруна жооп берди.

Август 01, 2005

СЕЛДЕН ЖАБЫР ТАРТКАН ЖАЛАЛАБАТТЫКТАРДЫН КӨЙГӨЙҮ

Быйыл табигый кырсыктар көп катталган Жалалабат облусунда 1994-жылдан бери төрт жарым миңден ашык үй-бүлө мамлекеттик жардамга муктаж. Алардын эки миң токсон сегизи тизмеге быйыл кошулду. Жылдын жарымы өтүп баратса да облустагы 18 үй-бүлөдөн башкасына өкмөттүк ссуда бериле элек.

Июль 28, 2005

ЖАЛАЛАБАТТА КАЛГАН БОЗГУНДАР ДА БИШКЕККЕ ТАШЫЛДЫ

28-июлда Жалалабат облусундагы өзбек бозгундарынын 120дан ашык өкүлү учактар менен Бишкекке ташылып кетти. 27-июлда 300дөн ашык бозгун «Манас» аэропортуна жеткирилген болчу. Бозгундардын айрымдары качкын макамы али бериле электигин, Кыргызстан укуктарын коргой албаса, үчүнчү өлкөгө кетүүгө мажбур болушаарын билдиришти.

Июль 27, 2005

БОЗГУНДАР ЖАЛАЛАБАТТАН УЧАК МЕНЕН ТАШЫЛЫП КЕТТИ

27-июлда Жалалабат облусундагы качкындар лагеринен жалаң эркек бозгундар учак менен белгисиз жакка ташыла баштады. Алардын кайда, кайсы өлкөгө ташылып баратканы жөнүндө адам укугун коргоочулар, эркин журналисттер, Акыйкатчынын облустагы өкүлдөрү да маалымат ала алышпады. Бозгундарды ташуу жөнүндө маалымат берилбегендиктен айрым адамдар качкындар лагеринен бардык эркек бозгундар чыгарылып кетти окшойт деп болжошууда.

Июль 25, 2005

БОЗГУНДАР ЛАГЕРИ ОН КҮНГӨ ЖАБЫЛДЫ

Жалалабат облусундагы бозгундар лагери Сузак райондук санитардык-эпидемия станциясынын токтому менен 21-июлдан тарта он күнгө жабылды. Учурда бозгундардын сегизи райондук ооруканада дарыланууда.

Июль 23, 2005

АКШ АСКЕР БАЗАСЫ ТУУРАЛУУ ЖАЛАЛАБАТТЫКТАРДЫН ПИКИРИ АР КЫЛ

АКШдан Америкалык авиабазалардын Борбордук Азия өлкөлөрүнөн чыгаруу мөөнөтүн билдирүүсүн каалаган Шанхай кызматташтык уюмуна кирген өлкөлөрдүн Астанадагы чечимине Жалалабат облусунун тургундары түрдүү пикирлерин айтышууда. “Манас” аэропортундагы «Ганси» авиабазасы Ооганстан эле эмес, Фергана өрөөнүндөгү терроризм, диний экстремизм коркунучтарынан сактап, кыргыз мамлекетине экономикалык да үлүш кошконун жактагандар аз эмес.

Июль 20, 2005

ӨРӨӨНДҮН ТЫНЧТЫГЫНА ДҮЙНӨ КЫЗЫКДАР

Фергана өрөөнү –дүйнө коомчулугунун көз кырында турат. Маңзаттарынын кан жолуна айланган өрөөндө эл аралык терроризм, диний экстремизм, наркобизнес, чек ара проблемалары, өлкөлөр аралык суу проблемалары олуттуу экендигин коопсуздук кызматтары белгилесе, Жалалабат облусунун өкүлдөрү террорчулук турмуштун оордугунан пайда болоорун жана өрөөндөгү тынчтыкты сактоо үчүн демократия, ачык айкындуулук жетишпей аткандыгын айтышат.