Норвегияда күрөш боюнча Дүйнө чемпионатына катышкан кыргызстандык спортчу кыздар кайтып келишти. Аларды 9-октябрда "Манас" эл аралык аэропортунда күйөрмандары майрамдык маанайда тосуп алышты.
Кыз-келиндер командасынын машыктыруучусу Нурбек Изабеков кыздар башкаларга үлгү болгонун айтып, алдыдагы жылдарда олимпиадаларда ийгилик жараткандар көбөйөрүн билдирди.
Дүйнөлүк чемпионатта кыз-келиндер күрөшүнөн Айсулуу Тыныбекова менен Мээрим Жуманазарова алтын, Айпери Медет кызы коло, эркин күрөштөн Эрназар Акматалиев күмүш, Алибек Осмонов коло байге алган.
Грек-рим күрөшүнөн 60 килограмм салмакта Жоламан Шаршенбеков финалга чыкты. Ал 9-октябрда молдовалык Виктор Чобану менен алтын үчүн беттешет.
Бул күнү күрөштүн аталган түрүнөн кыргызстандык Калы Сулайманов (63 кг) жана Марлен Асикеев (67 кг) килемге чыгат.
2-октябрда Осло шаарында башталган Күрөш боюнча Дүйнө чемпионаты 10-октябрда аяктайт.
Кыргызстандын тарыхында күрөш боюнча дүйнө чемпионатында алтын алгандар азырынча - Айсулуу Тыныбекова менен Мээрим Жуманазарова.
Айсулуу Токио олимпиадасынын күмүш, Мээрим коло медалын да алган.(SE)
Facebook шеринеси