Акын Сүйүнбай Эралиевдин 100 жылдык маарекесине арналган салтанат Абдылас Малдыбаев атындагы Кыргыз Улуттук академиялык опера жана балет театрында өттү. Ага бир катар мамлекеттик жана коомдук ишмерлер, акын-жазуучулар катышты.
Маданият, маалымат, спорт жана жаштар саясаты министри Азамат Жаманкулов Сүйүнбай Эралиевдин ырларын кайрадан китеп кылып басып чыгарууну жана анын ысымы менен поэзия жаатында сыйлык уюштурууну көздөп жатканын иш-чаранын жүрүшүндө маалымдады.
Маараке акын Эралиевдин ырларын көркөм окуу жана концерттик программа менен коштолду.
Сүйүнбай Эралиев 1921-жылдын 15-октябрында Талас облусунун Үч-Эмчек айылында туулган. Ал Улуу Ата Мекендик согушка катышкан. Алгачкы ыр жыйнагы 1949-жылы "Биринчи жаңырык” деген ат менен жарыкка чыккан.
Эралиев кыргыз поэзиясында биринчилерден болуп эркин ыр формасын 1966-жылы жазылган "Жылдыздарга саякат" поэмасында пайдаланган.
Ал Уитмендин, Тагордун, Турсун-Заденин, Твардовскийдин чыгармаларын кыргыз тилине которгон.
Эралиев Кыргыз Республикасынын Баатыры, Кыргыз ССРинин Токтогул атындагы Мамлекеттик сыйлыгы, "Элдердин достугу" ордени, III жана I даражадагы Манас ордени менен сыйланган.
Акын жана котормочу Сүйүнбай Эралиев 2016-жылы 95 жашында дүйнөдөн кайтып, сөөгү Бишкектеги “Ала-Арча” көрүстөнүнө коюлган. (MZh)
