Линктер

ЧУКУЛ КАБАР!
1-октябрь, 2020 бейшемби, Бишкек убактысы 21:40

БШК Лукашенко «ишенимдүү жеңгенин» жарыялады


Милиция демонстранттарды кууп таратыш үчүн суу бүркүп, желим ок менен атып, жаш агызган газ, кулак тундурган граната колдонду.

Беларустун Борбордук шайлоо комиссиясы (БШК) жекшембидеги президенттик шайлоонун баштапкы жыйынтыгын жарыялап, анда Александр Лукашенко ишенимдүү жеңгенин жарыялады.

Оппозиция добуш берүүнүн жыйынтыгы бурмаланганын айтып, аны таануудан баш тартты.

Минск шаарында 10-августка караган түнү миңдеген адамдар бийликти айыптап калайман каршылык акциясына чыкты жана ал тоз-тополоң менен коштолду.

Демонстранттар менен милициянын кагылышында ондогон адам жабыркады. Укук коргоочулардун эсебинде, бери дегенде бир киши мерт болду.

БШКнын башчысы Лидия Ермошина шайлоого катышкандар көп болгонун, шайлоочулардын 84,5% добуш бергенин билдирди. Ал 10-августта баштапкы жыйынтыкты жарыялап жатып, азыркы президент Александр Лукашенко ишенимдүү жеңгенин айтты:

«Александр Лукашенкону 4 652 423 адам колдоду. Башкача айтканда, ал 80,23% добуш топтоду. Светлана Тихановскаяга 574 312 адам добуш берди, тактап айтканда, дээрлик 10% жакын добуш алды. Бул - шайлоонун баштапкы жыйынтыгы. Добуш берүүнүн соңку жыйынтыгы боюнча БШКнын жыйынына карата дагы такталат. Бирок мен олуттуу өзгөрүү болот деп ойлобойм».

БШКнын маалыматына караганда, калган үч талапкердин ар бири бир пайыздан ашыгырак добуш топтоду. Шайлоочулардын 6% баарына каршы добуш берди.

Оппозиция добуштарды өз алдынча санаган. «Добуш» интернет-платформасындагы санакта Тихановскаяны шайлоочулардын дээрлик 80% ашыгы колдогон. Оппозициячыл талапкердин штабы добуш берүүнүн жыйынтыгын таануудан баш тартты.

Жекшембиде мамлекеттик экзит-полдун жыйынтыгы Лукашенко жеңгенин көрсөткөндөн кийин Минск баштаган бир катар шаарларда миңдеген адамдар көчөгө чыккан. Алар бийликти «добуш берүүнүн жыйынтыгын бурмалады» деп айтыпташкан. Милиция демонстранттарды кууп таратыш үчүн суу бүркүп, желим ок менен атып, жаш агызган газ, кулак тундурган граната колдонду.

«Весна» укук коргоо уюму тоз-тополоңдо бери дегенде бир адам мерт болгонун, 200дөн көп киши камалганын маалымдады. ИИМ адам өлүмү тууралуу фактыны бышыктай элек. Күч органдары 10-августка караган түндөгү окуяларга байланыштуу кылмыш ишин козгоду.

Кытайдын лидери Си Цзиньпин, Орусиянын президенти Владимир Путин Лукашенкону жеңиши менен куттукташты.

Тихановская менен Лукашенконун добуш бериши
please wait

No media source currently available

0:00 0:01:09 0:00

Беларуста соңку шайлоо мурдагылардан кескин айырмаланып, оппозициялык маанай күч алган, жапырт нааразылык акциялары көбөйгөн кезде өттү. Андан сырткары азыркы президент Александр Лукашенкого атаандаш талапкерлер чыкты. Шайлоо өнөктүгүнүн убагында журналисттер, блогерлер жана саясий активисттер сыяктуу ондогон адамдар камакка алынды.

Белгилүү видеоблогер Сергей Тихановский камакка алынгандан кийин шайлоого анын ордуна аялы Светлана Тихановская аттанган жана мурдагы үй кожойкеси Александр Лукашенконун башкы саясий атаандашына айланган. Анын штабы менен өткөн айда расмий каттоодон өтпөй калган Виктор Бабарико менен Валерий Цепкалонун штабдары бириккен. Натыйжада шайлоого үч аял - Тихановская, Бабариконун шайлоо штабынын координатору Мария Колесникова жана Цепкалонун аялы - Вероника Цепкало чогуу бир команда болуп аттанган.

Оппозициячыл талапкердин шайлоочулар менен жолугушууларына миңдеген адамдар катышкан. Добуш берүүгө саналуу күндөр калганда мындай жолугушуулар үзгүлтүккө учураган жана Тихановскаянын штабы буга байланыштуу бийликти айыптаган.

65 жаштагы Александр Лукашенко Беларусту 26 жылдан бери башкарып келатат. Ал ушуну менен алтынчы жолу шайланды.

Эскертүү!

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.​

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG