Линктер

ЧУКУЛ КАБАР!
3-Декабрь, 2022 ишемби, Бишкек убактысы 20:55

Стамбулга жеткен кыргыз тасмалары


"Саякбай" тасмасы.

Стамбулда кыргыз киносунун жумалыгы өтүүдө. "Коркут ата - Tүрк дүйнөсү" фильм фестивалынын алкагында өтүп жаткан бул жумалыкка Казакстан, Өзбекстан жана Азербайжандан барган киночулар дагы катышууда.

"Коркут ата - Tүрк дүйнөсү" фильм фестивалынын жана Kыргыз кинематографиясынын 80 жылдыгына карата Түркиянын Стамбул шаарында 10-12-ноябрда залкар жазуучу Чыңгыз Айтматовдун чыгармаларынын негизинде тартылган тасмалар көрсөтүлүүдө.

"Кызыл алма", "Эрте келген турналар", "Ак кеме", "Саякбай" сыяктуу кыргыз кинолору түрк көрүүчүлөрүнө сунушталды.

Ал эми режиссер Артыкпай Сүйүндүков тарткан "Шамбала" тасмасы фестивалдын толук метраждуу фильмдер номинациясында ат салышууда.

"Коркут-ата" фильм фестивалынын ачылыш аземи.
"Коркут-ата" фильм фестивалынын ачылыш аземи.

"Шамбаланын" Стамбулдагы премьерасына Кыргызстандан тасманын оператору Акжол Бекболотов жана актер Талант Апыев баштаган топ келди.

"Көптөн бери мен өзүм тартылган тасманы көрөм деп күтүп жүргөм. Азыр коноктор менен чогу көрөм. Буга чейин "Шамбала" көптөгөн сыйлыктарды алды. Бүгүн болсо Стамбулдагы иш-чара өтө жогорку деңгээлде өтүп жатат. Мындай иш-чара керек болчу. Анткени өзүңдүн казаныңда эле кайнай бербей, башкалардын иштерин да көрүүгө мүмкүнчүлүк жаралды. Балким, биргелешкен долбоорлор болуп калабы деген ойлор бар" ,- деди "Шамбала" фильминде Орозкулдун ролун аткарган, Ош улуттук драма театрынын көркөм жетекчиси Талант Апыев.

Ахмет Мисбах Демиржан.
Ахмет Мисбах Демиржан.

Стамбул шаарында алгачкы ирет уюштурулган "Коркут ата - Tүрк дүйнөсү" фестивалы Түркиянын Маданият жана туризм министрлигинин колдоосу менен өтүүдө.

Министрдин жардамчысы Ахмет Мисбах Демиржан "Шамбала" тасмасынын премьерасына өзү катышып, түрк тилдүү мамлекеттердин киноиндустрия тармагына токтолду.

"Кыргызстандын тасмалары эң жогорку деңгээлде экенин угуп жатабыз. Ушундай эле көрүнүш Казакстан, Өзбекстан жана Азербайжанда да байкалат. Киноиндустрияда тажрыйба жана технологиябызды айкалыштырып, тажрыйба алмашууга убакыт келди деп ойлойм. Ошондо гана дүйнөгө орток айта турган сөзүбүз болот", - деди Демиржан.

Орток долбоорлор демекчи, режиссер Жали Сооданбек да түрк тилдүү коңшу өлкөлөрдөгү кесиптештеринин тасмалары жана иштери менен жакындан таанышуу мүмкүнчүлүгү түзүлгөнүнө басым жасады.

"Фильм фестивалда түрк элдеринин арасындагы "Оскар" сыяктуу сыйлыкты максат кылып жатышат. Биздин тилибиз, динибиз, тарыхыбыз бир. Бирок бири-бирибиздин тасмаларыбызды көрбөйбүз. Жада калса, коңшу Казакстан, Өзбекстандын фильмдерин, алар биздикин көрбөйт. Орусия менен Голливуддун кинолорун көрө беребиз, бул туура эмес", - деди Жали Соданбек.

Незафет Асялы
Незафет Асялы

Ал арада бул кино фестивалга келген Түркияда жашаган кыргызстандыктардын да саны арбын экенин байкасак болот.

Вандык кыргыздардан Незафет Асялы пандемияда солгундап калган маданий иш-чаралардын жанданганына кубанып турганын айтты.

"Ата журттан алыс жүргөндө кыргыздардын чогулуп, бир иш-чарада болгонун көрүп жүрөк толкунданат экен. Бүгүн ондогон мекендешимди, кыргыз тасмаларын көрүп толкунданып турам. Эки жылдан бери пандемияда мындай жыйындар болбой, чүнчүп кеттик эле. Эми Кыргызстандан келген режиссер, актерлорду жолуктуруп сүйүнүп турабыз",- дейт Незафет.

Стамбулда өтүп жаткан жумалыкта Кыргызстан, Казакстан, Өзбекстан жана Азербайжан сыяктуу түрк тилдүү мамлекеттерден барган кинемотаграфия тармагындагы белгилүү инсандар да катышууда.

Ошондой эле бул өлкөлөрдөн барган сценарист, режиссер жана продюсерлер түрк киноиндустриясы менен жакындан таанышуу үчүн атайын платформа түзүлгөнү да кабарланды.

Фестивалдын жеңүүчүлөрү 12-ноябрда Стамбул шаарында жарыяланат.

  • 16x9 Image

    Элвира Будайчиева

    "Азаттык" радиосунун Стамбулдагы кабарчысы. Кыргыз-түрк "Манас" университетин жана Стамбулдагы Йедитепе университетинин магистратурасын бүтүргөн.

Facebook шеринеси

XS
SM
MD
LG