Линктер

ЧУКУЛ КАБАР!
23-Сентябрь, 2021 бейшемби, Бишкек убактысы 00:56

Тартип комиссиясы Гүлбара Калиеваны жоопко тартууга макулдук берүү маселесин карайт


Гүлбара Калиева.

Соттор кеңешинин алдындагы Тартип комиссиясы 4-марттагы отурумунда бир нече судьяларды жоопко тартууга макулдук берүү маселесин карайт. Алардын ичинде Жогорку соттун төрайымы Гүлбара Калиеваны жана Аскер сотунун мурдагы төрагасы Нурланбек Ашымбековду жоопко тартуу боюнча башкы прокурор Курманкул Зулушевдин өтүнүчү каралат.

Булардан тышкары Талас, Жалал-Абад облустук, Жалал-Абад шаардык жана Араван райондук соттордун судьяларын жоопко тартууга макулдук берүү маселеси ортого салынат.

"Жергиликтүү сот" долбооруна байланыштуу коррупциялык ишти иликтөөнүн алкагында былтыр декабрда Башкы прокуратура Жогорку соттун төрайымы Гүлбара Калиеваны жоопко тартууга уруксат берүү өтүнүчү менен Тартип комиссиясына кайрылган.

УКМК төрагасы Камчыбек Ташиев былтыр 24-декабрда «Жергиликтүү сот» автоматташтырылган маалыматтык системасын ишке ашыруу боюнча коррупциялык схема аныкталганын, ага төрайым Гүлбара Калиеванын тиешеси бар экенин, эгер Тартип комиссиясы макулдук берсе, ал камакка алынарын айткан.

Калиева 29-декабрда «Азаттыктын» түз эфиринде сүйлөп жатып Ташиевдин билдирүүсүнөн кийин Жогорку соттун каржылык документтери текшериле баштаганын, бирок анын айткандарына далил табылбай жатканын жарыялаган. Ал Жогорку сотту санарипке өткөрүү долбоорун Европа Биримдиги ишке ашыргандыктан, ага кийлигишүү болбогонун жана жеке өзү эч кандай документке кол койбогонун билдирген.

Быйыл 5-февралда атайын кызмат Калиева дагы бир доого кабылып, кызмат абалынан кыянаттык менен пайдаланган деп шек саналып жатканын кабарлаган. Жогорку соттун басма сөз кызматы муну куру доомат деп атаган.(ZKo)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG