Пакистан өкмөтү былтыртан бери Францияга каршы акцияларды уюштуруп келген, ашынган "Техрик-и-Лаббайк" (TLP) партиясына тыюу салынарын билдирди. Ички иштер министри Шейх Рашид 14-апрелде партиянын иши террорчулукка каршы мыйзамдарга ылайык токтотуларын маалымдады.
"Биз дүйнөгө экстремист улут катары таанылгыбыз келбейт", - деди Рашид.
Анын мындай билдирүүсүн 13-апрелде борбор шаар Исламабадда аталган партия уюштурган нааразылык акцияга чыккандар күч менен таркатылгандан көп өтпөй жарыялады.
Шаршембидеги тоз-тополоңдо беш адам, анын ичинде эки полиция кызматкери курман болду. "Техрик-и-Лаббайктын" тарапкерлери ал күнү партия лидеринин бошотулушун талап кылып көчөгө чыккан. Партиянын башчысы Саад Ризви 12-апрелде чыгыштагы Лахор шаарында "мыйзамдуулукту жана тартипти бузганы үчүн" камакка алынган. Мунун алдында ал тарапташтарын Пакистандагы француз элчисин өлкөдөн чыгарууга үндөгөн.
Полиция 13-апрелде Ризвиге терроризмге байланыштуу кылмыш иши козголгонун билдирди.
Пакистандагы ашынган оңчул диний-саясий уюм саналган «Техрик-и Лаббайк Пакистан» (ТЛП), «Кызматыңыздамын, Пакистан!» кыймылы) партиясы былтыр француз президенти Эммануэл Макрондун сөз эркиндигин, анын ичинде Мухаммед пайгамбар тууралуу карикатураны жарыялоо эркиндигин коргогон сөзүнө нааразылык билдирип келишет. (ZKo)
