"Азаттык" аймактардагы кабарчылар жиберген сүрөт жана видеолор топтомун жарыялоону улантат.

Ысык-Көл

27-июлда каза болгон Ысык-Көл районунун башкы реаниматологу Сарбагыш Иманалиев кыргыз медицинасына өмүрүнүн 35 жылын арнаган, райондогу жандандыруу бөлүмүн чуркап жүрүп түзгөн. Ал пандемия маалында оор абалдагы бейтаптарды карап жатканда коронавирус жугуп, бул дүйнөдөн узап кетти. Аркасында үч уул, бир кызы жана жубайы калган дарыгердин кыргыз медицинасын өнүктүрүү кыялдары орундалбай калды.

Кыргызстан араб уюмдары берген насыяга Ысык-Көл облусунда 80 чакырымдык автожолду оңдойт. Сауд Арабиясы менен Кыргызстандын ортосунда былтыр кабыл алынган келишимди ратификациялоо тууралуу мыйзамга кол коюлганын президенттин басма сөз кызматы 4-августта кабарлады.

Баткен

Баткен облусунда 90 орундуу оорукананын курулушу башталды. Өкмөттүн Баткен облусундагы ыйгарым укуктуу өкүлү Алишер Абдрахманов 4-августтагы онлайн брифингде билдиргендей, жаңы бейтапкананын курулушу үчүн мамлекет 12 миллион сомдон ашуун каражат бөлгөн.

Баткенде вирусту аныкташ үчүн үймө-үй кыдырып жатышат

Баткен облусунда коронавирустун алдын алуу үчүн 23-июлдан тартып дарыгерлер, жергиликтүү бийлик өкүлдөрү үймө-үй кыдырып жатышат.

Бул тууралуу өкмөттүн Баткен облусундагы ыйгарым укуктуу өкүлү Алишер Абдрахманов 4-августтагы онлайн брифингде билдирди.

Кадамжайлык тургундар Бишкектеги обсервацияларда коронавируска каршы күрөшүп, «кызыл аймакта» иштеген медициналык кызматкерлерге 700 килограмм бүлдүркөн кыямын тартуулашты.

«Кадамжай жардам штабынын» координатору Айтмат Азамжан уулу «Азаттык» радиосуна кадамжайлык багбандар өздөрү өстүргөн кожогатын кыям кылып, медицина кызматкерлерине ыраазылык иретинде беришкенин билдирди:

«Кожогаттын курамында түрдүү вируска каршы пайдалуу витаминдер бар. Ошондуктан багбандар алдыңкы катарда коронавируска каршы күрөшүп жаткан дарыгерлердин ден соолугу үчүн өздөрү өстүргөн малинадан кыям жасап, берип жиберишти».

Азамжан уулунун айтымында, кыям борбор шаардагы бардык обсервацияларга, ооруканаларга жана күндүзгү стационарларга жеткирилди.

Ош

Ош шаарындагы Исхак Раззаков атындагы көчөдө жайгашкан «Ак-Шумкар» тойканасында 4-август күнү саат 11лерде өрт чыкты. Өзгөчө кырдаалдар министрлигинин (ӨКМ) маалыматына караганда өрттөн эч ким жабыр тарткан жок.

«Өрт саат 12:28де толук өчүрүлгөн. Жабыркагандар жок. Өрт тууралуу маалымат 11:08де түшүп, 12:28 толугу менен өчүрүлгөн», - деп жазылган ӨКМдин билдирүүсүндө.

Жалал-Абад

Жалал-Абад шаарынын аймагында коронавирус эпидемиясына байланыштуу кирген чектөөлөрдүн мөөнөтү узартылды. Бул тууралуу шаар башкармалыгы кабарлады.

Тамактануучу коомдук жайлардын, түнкү клубдардын жана кафе-ресторандардын мурдагыдай эле кечки саат 8ге чейин иштей турган болду. Жеткирип берүү кызматтары иштей берет.

Нарын

Нарын шаарында 24 орундуу, үч кабаттуу медициналык борбор курулат. Коронавируска каршы күрөш боюнча республикалык штабдын 4-августтагы жыйынында курулушка өкмөт берген 6% жеңилдетилген насыя жумшалары айтылды.

Учурда медициналык борбор үчүн Нарын облустук бириктирилген ооруканасынын жанынан жер сатылып алынды. Курулушту баштоо аракеттери жүрүп жатат.

Боронов: Жеке коргонуучу каражатты көрө элек айылдар бар

Ыкчам штабдын жыйынында премьер-министр Кубатбек Боронов медицина кызматкерлерин инфекциядан коргонуу каражаттары менен камсыз кылуу иши жетишсиз экенин айтты.

Өкмөт башчы жеке коргонуучу каражат көрө элек айылдар да бар экенин белгиледи.