Куралдуу жаңжал токтобой жаткан Суданда 19 миллиондон ашуун киши ачарчылык коркунучуна кептелди. Африкалык өлкөдөгү гуманитардык кризис тууралуу жекшембиде БУУнун Азык-түлүк программасынын расмий өкүлү Мохамед Гамал кытайлык медиа топко берген интервьюда билдирди.
Маалыматка караганда, Судандын калкынын дээрлик жарымы – 24,7 миллион киши, арасында 13 миллион бала гуманитардык жардамга муктаж.
Эрегишкен күчтөрдүн 100 күндөн бери уланып келаткан жаңжалынан улам суу, электр энергиясы жана газ менен камсыздоо үзгултүккө учурап, жер-жерде тамак-аш, дары-дармек тартыш болууда.
Гамалдын айтымында, уюмду өзгөчө Батыш Дарфурдагы абал тынчсыздандырат. Ал жакка гуманитардык жардам жеткирүү кыйын болууда. Азык-түлүк программасы касташкан тараптарды гуманитардык коридор түзүүгө чакырып келатат.
Судан армиясы менен "Ыкчам колдоо күчтөрү" тобу ортосундагы уруш башталган 15-апрелден бери өлкөдөн 2,8 милллион киши чыгып кетти.
Өлкөнүн Саламаттык сактоо министрлиги жарыялаган маалымат боюнча, кагылышуулар 3 миңден көп кишинин өмүрүн кыйды, 6 миңден ашуун адам жарадар болду.
