Ырысбай Абдыраимов

Сентябрь 02, 2007

КЫЙРОО АБАЛЫНДА ТУРГАН МЕКТЕПТЕР ДАГЫ ЭЛЕ БАР

Кечээ Кыргызстанда билим күнү белгиленип, миңдеген балдар биринчи жолу мектеп босогосун атташты. Бирок баардык эле жерлерде телегей тегиз эмес. Алсак, Жалалабат облусунда ушул тапта 32 мектеп эскирип, алардын айрымдары кыйроо абалында турат. Ал аз келгенсип айрым мугалимдер башка мамлекеттерге иш издеп кетишүүдө.

Август 31, 2007

ӨЛКӨ ЭКОНОМИКАЛЫК ТУТКУНДА ТУРАТ

Өлкө 16 жыл ичинде саясий эркиндикке жетишкени менен экономикалык жактан чет өлкөлөргө көз карандылыгынан кутулган жок. Менчиктештирүү туура эмес жүргүзүлүп, гендердик саясат аксады. Жумушсуздук менен начар турмуштун айынан эмгек миграциясы күчтүү болууда. Өлкөнүн көз каранды эмес күнүнө карата Жалалабаттык тургундардын ойлору мына ушундай.

Август 29, 2007

ДЕРЕКТИР АЛМАШКАНГА МУГАЛИМДЕР НААРАЗЫ

27-августта Жалалабат шаарындагы эки мектептин мугалимдери менен ата-энелердин өкүлдөрү облустук жана шаардык бийликтердин алдына келишти. Алар шаардагы мыкты деп саналган гимназия мектебинин деректиринин кызматтан бошотулганына жана Жусуп Бакиев атындагы мектептин директорун ошол гимназия мектепке которууга нааразы болушту. Гимназия мектептин жамааты талабы аткарылбаса президентке кайрыла тургандыгын билдиришти.

Август 28, 2007

СУУСАМЫР ЖАЙЛООCУНДА КЫМЫЗ МЭЭНЕТТИ АКТАБАЙ КАЛДЫ

Жумушсуздук менен жан багуунун айынан Суусамыр өрөөнүн жайлап, кымыз жана башка азык-түлүк саткан Чүй, Талас, Жалалабат облустарынын миңдеген тургундарынын мээнети акталбай калууда. Ош-Бишкек жолунун жанына боз үй тигип жашаган жылкычылар менен малчылар сырт дүйнөдөн бөлүнүп калган. Бул жерде электр жарыгы жок, буудай же арпа бышпайт, азык-түлүк тартыш, кымбатчылыктын айынан ишкерлер да азык-түлүк ташып келип сатпай калган.

Август 24, 2007

ЖАЛАЛАБАТ: ЖЕР ЭЭЛЕГЕНДЕР КАРШЫЛЫК АКЦИЯСЫНА ДАЯРДАНУУДА

2005-жылы Жалалабат шаарындагы канаттуулар фабрикасынын аймагын басып алгандардын бир нече өкүлдөрү 22-августта облбийлик алдында пикет өткөрүштү. Алар ээлеген жерлерин мыйзамдуу жолдор менен туура бөлүштүрүп берүүнү талап кылышты.Талаптары аткарылбаса, Бишкек жөө жүрүшүн уюштуруу менен ачкачылыкка чыгып, эгемендик күнүндө да нааразылык акциясына чыгаарын билдиришти. Шаар мэри Дүйшөн Мамасалиевдин жообу боюнча басып алынган жерлер турак-жай үчүн жылдап кезекте тургандарга берилет.

Август 20, 2007

КЫРГЫЗСТАНДЫН ТҮШТҮГҮНДӨ МААЛЫМАТ КООПСУЗДУГУ КОЛДОН ЧЫГЫП БАРАТАБЫ?

Калкты маалымат менен камсыз кылууда өлкөнүн маалымат каражаттары дагы эле чабалдыгын көрсөтүүдө. Жалалабат облусунун көрөрмандары өзгөрүүгө аракет кылып жаткан КТРдин ишине анча канааттана беришпейт. Коомчулуктун пикиринде угармандар менен көрөрмандардын көпчүлүгү берүүлөрү кызыктураак Өзбекстандын үналгы-сыналгыларына көнүп алышкан.

Август 19, 2007

КЫРГЫЗСТАНДА КҮЗДӨ ОЛКУ-СОЛКУЛУК БОЛОБУ?

Күздүн келиши менен өлкө кайрадан олку-солкулуктун чордонуна айлануусу ыктымал. Мындай болжолду Ф.Куловдун билдирүүсүнөн кийин Жалалабат облусундагы айрым саясий партиялар да айтып чыгышты. Саясий туруксуздуктун жаралышына социалдык-экономикалык реформалардын начар жүрүүсү, конституциялык реформанын кечеңдеши, өлкөдөгү мыйзамсыздыктар менен кен байлыктардын туура эмес иштетилип, Манастын күмбөзүндөгү кароол чокудагы казуулар түрткү бериши ыктымал. Бийлик өкүлдөрү менен бийликти жактаган партиялардын ишениминде саясий реванш алууну каалаган адамдар өлкөнү жасалма жол менен олку-солкулукка түртүүдө.

Август 18, 2007

ЖАЛАЛАБАТ: ЧЕКТЕШ АЙЫЛДАР ЖАРЫК ҮЧҮН ӨЗБЕКСТАНГА КӨЗ КАРАНДЫ

Жалалабат облусунун чек арадагы бир нече айыл кыштактары электр жарыгын Өзбекстандагы коңшулаш кыштактардан алышат. Алар электр жарыгынан тышкары эгин жана ичеер суулары менен жол жагынан да кошуна мамлекетке көз каранды болуп келатат. Коңшу мамлекет электр жарыгын каалаган маалда өчүрүп коет. Ошондуктан кыргыз айылдары таза сууга муктаж болуп, анын айынан ооруга туш болууда. Аргасыздан көчүп кетип жаткандары да аз эмес. Облбийликтин түшүндүрмөсүндө чек ара кыштактарын жарык менен камсыз кылууга жергиликтүү бийликте каражат жок.

Август 16, 2007

ЖАЛАЛАБАТ: ЖЕР ЭЭЛЕГЕНДЕР НААРАЗЫ

2005-жылы Жалалабат шаарындагы канаттуулар фабрикасынын аймагын басып алгандардын 40 өкүлү 13-августта шаар мэриясы менен облустук бийлик алдында пикет өткөрүштү. Алар ал жерлерди мыйзамдуу жолдор менен туура бөлүштүрүп берүүнү талап кылышты. Талаптары аткарылбаса Бишкек жөө жүрүшүн уюштуруу менен түрдүү акцияларды баштаарын эскертишти. Шаар мэри Дүйшөн Мамасалиевдин жообу боюнча турак-жай курууга ким муктаж экендиги, жер ээлегендердин канчасы кезекте туруп, нечеси шаар тургуну экендиги иликтенүүдө.

Август 15, 2007

ЖАЛАЛАБАТ: САММИТ ТУУРАЛУУ ПИКИРЛЕР АР ТҮРДҮҮ

16-августта Бишкекте өтө турган ШКУнун саммити тууралуу Жалалабат облусунун тургундарынын пикирлери ар түрдүү. Айрымдары саммит Кыргызстандын дүйнөгө андан ары таанылышына өбөлгө түзөт, инвестициялардын келүүсү күч алат дешсе, саммитке анча деле үмүт артпагандары да бар.

Август 10, 2007

ЖАЛАЛАБАТ: САММИТ АЛДЫНДАГЫ ШЕКТЕНҮҮЛӨР

Жалалабатта ШКУнун саммитинин алдында бир нече үйлөр тинтүүгө алынып, 4 киши убактылуу кармалгандан кийин кое берилди. Алар, "куралдуу кишилердин тинтүүсү коркутуп-үркүтүү менен коштолгонун, коопсуздук жана аскер адамдары үйлөрүнө жарылгыч заттар менен ок дарыларды атайылап таштап койгондугун" адам укугун коргоочуларга билдиришкен. Облустук бийликтин белгилешинче, текшерүүлөрдүн ШКУнун саммитине тиешеси жок жана коопсуздукту сактоо үчүн жүргүзүлгөн күндөлүк иш.

Август 09, 2007

ЖАЛАЛАБАТ: ШАЙЛОО ДОЛБООРУ БАЙЛАРГА ЫЛАЙЫКТАЛГАНБЫ?

8-августта облустагы саясий партиялар менен өкмөттүк жана бейөкмөт уюмдар шайлоо кодексинин соңку долбоорун талкуулашты. Тегерек үстөлдө дайын болгондой, шайлоо кодексинин долбоорунда партиялардын өз ара блок түзүү жагы, айыл өкмөттөрү менен район-шаар кеңештерин партиялык тизме менен шайлоо жагы көрсөтүлбөй, байкоочулардын укуктары тууралуу толук жазылбаган. Талапкерлердин күрөө акылары байманалуу адамдардын гана президенттик-парламенттик шайлоого катышуусуна шарт түзгөн.

Август 09, 2007

ЖАЛАЛАБАТ: ӨЗБЕКСТАНДЫК КЫРГЫЗДАР УНУТТА КАЛДЫБЫ?

Аксы райондагы Торук айылы экиге бөлүнүп калган. Райондун Кошдөбө айыл бийлиги Өзбекстандагы торуктук кыргыздар жашаган беш гектар жерди кыргыз тарабына өткөрүп алууну, айылдын Өзбекстанда калган бөлүгүнүн жашоочулары кыргыз бийликтеринен там-ташы менен түпкү мекенине көчүрүп алууну талап кылууда. Өткөн аптада Аксыда болгон өкмөт башчы Алмаз Атамбаевдин пикиринде, чегара кыштактары үчүн өзүнчө мыйзам зарыл.

Август 06, 2007

«АТАМЕКЕН» ПАРТИЯСЫ ЖАЛАЛАБАТТА ЖЫЙЫН КУРДУ

«Ата Мекен» партиясынын өкүлдөрү өз жыйынында өлкөдөгү коомдук-саясий, социалдык-экономикалык абалды талкуулап, абалдын оор экендигин белгилешти.

Август 03, 2007

ЖАЛАЛАБАТ: ДИНИЙ ЭКСТРЕМИСТТЕР АКТИВДҮҮЛҮГҮН КҮЧӨТТҮБҮ?

1-августта Жалалабат облустук бийлигинде экстремизм менен терроризмди алдын алууну жана Кыргызстандагы диний кырдаалды талкуулаган кеңешме болуп өттү. Өлкөдө тыюу салынган диний экстремисттик жана террорчул уюмдар өз активдүүлүгүн айрыкча орозо жана курман айттарынан кийин күчөтүп ийишти. Алардын катарына жумушсуздар менен жаштар, аялдар жана түрмөдөн чыккандар тартылууда. Аларга каршы жүргүзүлгөн иш-аракеттер коомчулукту канааттандырбайт.

Июль 28, 2007

ӨКМӨТ БАШЫ АКСЫ РАЙОНУНДА ИШ САПАРЫ МЕНЕН БОЛДУ

Өкмөт башчы Алмаз Атамбаев жана аны коштогон бир топ министрлер кечээ 27-июлда Аксы районунда болуп кетишти. Анын жергиликтүү калк менен жолугушуусунда райондогу бир топ социалдык-экономикалык маанидеги маселелер көтөрүлдү. Өкмөт башчы ошондой эле кечке маал Аксы окуясында шейит болгон балдардын арбагына куран окутту.

Июль 27, 2007

ЖАЛАЛАБАТ: ЖОЛ КЫРСЫКТАРЫ ЭРЕЖЕ САКТАБАГАНДЫКТАН ЧЫГУУДА

Жалалабат облусунун жолдорунда соңку учурларда жол кырсыктары көбөйүп кетти. Алты ай ичинде 83 киши жол кырсыгынан каза таап, 281 адам түрдүү деңгээлде жарадар болду. Кырсыктын көп бөлүгү Ош-Бишкек унаа жолуна туура келет. Өлкөнүн башкы жолунда опурталдуу бурумдардын көптүгү менен жол белгилердин коюлбаганы жана айдоочулардын жол эрежелерин сактабаганы менен облустагы жолдордун кейиштүү абалы кырсыктардын көп болуусуна шарт түзүүдө. Жан багуунун айласынан айдоочунун күбөлүгүн сатып алып жолго чыккан адамдар кырсыкты пайда кылууда деген пикирлер да бар.

Июль 26, 2007

ЖАЛАЛАБАТ: ДЫЙКАНДАР ПАХТА АЙДАГАНДАН КАЧА БАШТАДЫ

Жалалабат облусунда пахта быйыл былтыркыдан 5 миң гектарга аз айдалды. Пахтанын чыгымы көп жана жумшалган мээнет акталбагандыктан дыйкандар башка өсүмдүктөрдү эгүүгө аргасыз болушкан. Суу, үрөн, техника, минералдык азыктарды сатып алалбай, пахта аянттарын бош калтырган дыйкандар да аз эмес. Пахтанын аз айдалышына жер иштетчү жаштардын башка өлкөлөргө жумуш издеп кеткени да себеп болду. Облустук бийлик айыл чарба тармагы жазында үрөн жана техникалык каражаттар менен камсыз болгонун айтууда.

Июль 21, 2007

КУШБАК ТЕЗЕКБАЕВДИН ЖАКТООЧУЛАРЫ НААРАЗЫ

Кушбак Тезекбаевдин жактоочулары бүгүн дагы нааразычылык билдиришти. Алар 20-июль күнү кечинде Ош-Биишкек жолун Карасуу районунун Отузадыр айыл өкмөтүнүн тушунан тосуууга аракет кылышты. Бирок жергиликтүү бийлик менен коомчулуктун, укук коргоо уюмдардын кийлигишүүсү менен жол тосулган жок. Ал эми бүгүн 21-июлда Отузадыр айыл өкмөтүндө болгон Карасуу райондук бийлигинин, облустук укук коргоо уюмдарынын башчылары менен жолугушууда Кушбак Тезекбаевди тезинен бошотуу, анын баш коргоо чарасын өзгөртүү, ага байланыштуу тергөө ишин Ош облусунда жүргүзүүнү талап кылышты. Анын жактоочулары Тезекбаевдин саясий өңүттө каралганын айтышса, Ош облустук ички иштер башкармасы ал 5 кылмыш ишинин негизинде кармалганын билдирди. Ал эми Тезекбаевдин каршы тараптары март ыңкылабынын шарданы менен кызматка кокусунан келип калганын айтып атышат.

Июль 20, 2007

ЖАЛАЛАБАТ: АЯЛДАР ТУРМУШ КОРДУГУНА ЧЫДАБАЙ ӨЗ ӨМҮРҮНӨ КОЛ САЛУУДА

Жалалабат облусунда соңку учурларда аялдардын өз өмүрүнө кол салуусу кайталанууда. Үй-бүлөдө кейиштүү окуялардын пайда болушуна жубайлар арaсындагы түшүнбөстүктөр, аракечтик жана жашоонун оордугу себеп болууда. Үй-бүлөлүк чыр-чатактын айынан Ноокен районунда өзүн өзү өрттөгөн беш балалуу аял каза болуп, анын сөөгү 18-июлда жерге коюлду. Жыл башында Базаркоргон районунда да бир аял өзүн өзү өрттөгөн. Эксперттер үй-бүлөлүк чыр-чатактардын себебин эркектерден издесе, облуста жакында түзүлгөн кризистик борбор эркектер да коргоого муктаж экендигин билдирүүдө.