Линктер

шаршемби, 20-июнь, 2018 Бишкек убактысы 08:03

Былтыр октябрь айында окуудан чыгарылган мектеп окуучусу үчүн Бишкек шаарындагы №32 мектептин директоруна шаардык билим берүү башкармалыгы сөгүш берди. Мындай жазаны жетишсиз деп эсептеген Булан институту шаар мэринен жооп күтүп жатканын билдирди.

Окуудан чыгарылган баланын коомчулукта кызуу талкууланган окуясына байланыштуу Бишкек мэриясынын билим берүү башкармалыгынын чечими менен №32 мектептин директору Асел Сыдыкова сөгүш алды.

Булан институтунун директору Чолпон Орозобекова ага сөгүш берүү жетишсиз, бул окуя мектептерде окуучулардын укуктарынын тепселишине каршы сабак болушу керек деп эсептейт:

Чолпон Орозобекова.
Чолпон Орозобекова.

- Сөгүш берүү жетишсиз. Себеби мектеп директору төрт окуучуну педкеңешке салып туруп, чейректин ортосунда окуудан кетирген. Бул жерде директор мыйзамды орой бузган. Бир дагы директор мыйзам боюнча окуучуну мектептен чыгарып салууга акысы жок. Ал директордун кылганына укуктук баа берилиши керек эле. Сөгүш берүүдөн эч нерсе өзгөрбөйт.

Былтыр октябрда Булан институту Бишкек шаарындагы №32 мектепте мугалимдер кеңешинде төрт окуучу "начар окуйт" деген жүйө менен окуудан чыгарылганын, муну менен мыйзам бузулганын жарыялаган. Натыйжада окуучулардын бири, 9-класста окуган бала бир нече күн бою сабакка да, үйүнө да барбай жоголуп кеткени, ага чейин ал мектеп фонду талап кылган акчаны бере албаганы үчүн теңтуштарынын көзүнчө класс жетекчисинен жана мектеп директорунан тил угуп жүргөнү белгилүү болгон.

Окуя боюнча Булан институту Кыргызстандын Билим берүү жана илим министрлигине, Бишкек шаардык мэриясына жана шаардык билим берүү башкармалыгына кайрылган. Коомчулукта болсо жең ичинен акча жыйноо маселеси кызуу талкууга түшкөн.

Шаардык билим берүү башкармалыгынын адиси Надира Саякбаева №32 мектептин директору менен мугалимдерине, ошондой эле билим берүү мекемелеринде мыйзамсыз акча чогултуу боюнча чара көрүлгөнүн билдирди:

- Бүгүнкү күндө Дыйканбаев ошол эле мектепте окуп жатат. Мектеп директоруна сөгүш берилген. Мындан сырткары эки мугалимге Эмгек кодексинин 146-беренесине ылайык эскертүү берилген. Билим берүү башкармалыгы жалпы билим берүүчү мекемелерде мыйзамсыз акча чогултууга тыюу салган буйрук чыгарып, аны менен бардык директорлор жана педагогикалык жамааттар таанышып чыгышкан.

Эмгек кодекси боюнча жооптуу кызматкер мыйзамсыз аракет кылган болсо, ага алгач эскертүү берилип, андан кийин сөгүш жарыяланып, андан соң аны жумуштан алуу боюнча чечим чыгарылат.

Саякбаева шаардык мектеп директорлорунун ишмердүүлүгүн башкармалык көзөмөлгө аларын, милдеттерин так аткарбагандарына Эмгек кодексинин 146-беренесине ылайык кызматтык чара көрүлөрүн кошумчалады.

Эмнеси болсо да сөз болуп жаткан окуя социалдык тармактарда "мектеп директорлору сөгүш менен эле кутулуп, жазасыз калаарын" айткан уу-дуу кептерди пайда кылды. "Мыйзамсыз иш-аракети үчүн ар бир директор тиешелүү жазасын алышы керек" деген пикирди мурдагы билим берүү министри Ишенгүл Болжурова да колдойт. Бирок ал мындай окуялар бардык мектеп жана мугалимдерге көө сүйкөп жатканына каршы:

Ишенгүл Болжурова.
Ишенгүл Болжурова.

- Маселе объективдүү каралышы керек. Мектептерге жардам бергендин ордуна эмне болсо эле мектептин директорун же мугалимдерин күнөөлөп чыгышат. "Ата-энелер эч бир жоопкерчилик албайт, бизди эле урушат" деп ыйлаган мугалимдер канча болду? Шаардык кээ бир мектептердин директорлору көпкөн, алар менен убагында мен дагы далай күрөшкөм. "Конкреттүү түрдө мына ушул мектептин директору мыйзам бузду" деп чара көрүш керек. Жалпы эле айта берсек, мектептердин баары жаман деген пикирлер жаралат.

Бишкек шаардык билим берүү башкармалыгына караштуу мектептердин директорлору башкармалыктын жетекчисинин буйругунун негизинде дайындалат. Мектеп директорлору менен Кыргыз Республикасынын Эмгек кодексине ылайык беш жылдык эмгек келишими түзүлөт.

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.
  • 16x9 Image

    Айгерим Акылбекова

    "Азаттык" радиосунун кабарчысы. 2014-2016-жылдары "Азаттык+" телепрограммасынын алып баруучусу. Кусейин Карасаев атындагы Бишкек гуманитардык университетинин журналистика факультетин аяктаган. 

Сиздин пикир

пикирлерди көрсөт

XS
SM
MD
LG