Борбор Азия

Окуп отурганга шартыңыз келбесе, баянды бул жерден угуңуз:





АЛГЫ СӨЗ

Кыргызстанда сан жагынан аз, бирок айтканын бербеген көшөргөн исламизмдин жүзү жакында Турсунбай Бакир уулунун укук коргоочулардын бири менен кайым айтышуусунда айрыкча "жарк" этти бейм.

"Азаттыктын" апталык «Ыңгайсыз суроолор» сыналгы берүүсүндөгү бул талкууда мурдагы Акыйкатчы жана учурдагы депутатка бейөкмөт уюмдун жетекчиси Динара Ошурахунова оппонент болгон.

Окурмандардын болуп көрбөгөндөй кызуу талаш-тартышын жараткан бул кайым айтышта Ошурахунова секуляардык, демек, мамлекет динден ажырым болгон түзүлүштү колдогон күчтөрдүн атынан чыкты.

Талаш Жогорку Кеңештин бир нече депутаты "парламентте намазкана ачабыз" дегенден башталган эле.

Кыргызстан секулярдуу мамлекет экендигин бетке кармаган бир катар укук коргоочулар мамлекеттик каражатты бир диндин өкүлдөрүнө сарптоого каршы чыгышты.

Мусулман кесиптештеринин укугун талашкан саясатчы, "Ар Намыс" партиясынын өкүлү Турсунбай Бакир уулунун өзүн атеист деп атаган Ошурахунова менен чуулгандуу дебаты кыргыз коомунда адептүү сүйлөшүүнүн маданияты анчалык өнүгө элек экендигин да көрсөттү.

Мусулман гана адеп-ахлакты билеби?

Талкуунун маданияты жана секулярчылардын диний талкууда такшалбагандыгы - бир маселе.

Мисалы, Ошурахунова жөөттөр менен христиандардын диний салттарынан улам ишемби, жекшемби күндөрү көп өлкөлөрдө дем алыш болуп калгандыгын айта алган жок.

Кеп Кыргызстанда "ислам дини бардык проблемаларды чечип берет" деген популисттик турумдун улам кеңири жайылып бараткандыгында.

“Ыңгайсыз суроолор" талкуусунда экс-омбудсман өлкөдөгү акыйкат башкарууну момун мусулмандар гана кепилдей алат деген кыяста сүйлөдү:

- Сизге окшогон адамдар (Ошурахунованы айтып жатат. - Ж.С.) Батыштан акча алып, Кыргызстандын эмес, Батыштагы кожоюндардын акчасын ойлойсуздар. Эгерде Кыргызстандын элин ойлосоңор, ыймандуулук келсе, мугалимдердин, дарыгерлердин да маселеси чечилет.

Бакир уулунун айткандарынан ошондой эле жаман иштерге көбүнчө атеисттер, мусулмандардын тилинде айтканда, капырлар барат деген жыйынтык чыгарууга болмок:

- Бүгүнкү күнү 17 миң адам түрмөдө отурат, ошонун 16 миңи атеисттер. Эмне үчүн ошолор айтылбайт?

Кыргызстан секулярдык түзүлүштөн баш тартып, мусулманчылыктын мыйзамдары менен жашай баштаса, башкача айтканда, конституцияны шарият алмаштырса, бардык терс көрүнүштөр жоюлуп калабы?

Араб исламчылары демократиянын даңгыр жолунда

Кезегинде Иранда да айатолла Хомейни жана анын жолдоочулары ушундай эле ураан менен бийликке келишкен.

Сауд Арабия, Пакистан, Ооганстан шарият мыйзамдарынын негизинде жашайт. Бул өлкөлөрдөгү элдин ал-акыбалы бирок араб өлкөлөрүндөгү башка элдерди анчейин шыктандырган жок.

Бул айрыкча соңку айларда араб дүйнөсүн солкулдаткан элдик толкундоолордон улам даана байкалды.

Алжирде, мисалы, өткөн кылымдын этегинде ички согуштун жол башчыларынын бири, исламчы Али Бе-л-Хажж "аялдар иштебей үйдө отурушу керек" деген өңдөнгөн көз караштарынан улам, демократиянын келишкис душманы катары таанылган. Ал жакында баш-аламандыктан пайдаланып, өз идеяларын кайра сунуштап чыкты. Бирок демонстрациялардагы жаштар анын артынан ээрчиген жок.

Ыңкылапка көтөрүлгөн Египет менен Тунистин да "аятолла Хомейниси" жок болуп чыкты.

Кеңири таасирге ээ деп саналган “Мусулман агайиндер” кыймылы элдин түрпүн байкады окшойт, Египетте "мамлекет башчысынын кызматын талашпайбыз деле" деген билдирүү жасап келет.

“Агайиндер”, балким, алды менен жер-жерлерде өз таасирин жайылтып, анан жогорку бийликти алууну пландап жаткан болушу мүмкүн экендиги бөлөк маселе.

Кечээ жакында элдик толкундоолордо президенти бозгунга качып кеткен Тунисте да исламчылар элге демократиялык эркиндиктерди убада кылышууда.

Исламга кастарын тикпестен, ошол эле убакта демократиянын түп-негиз мыйзамдарын урматтаган мындай кыймылдардан айырмаланып, Сауд Арабиясы сыяктуу өлкөлөрдө эскичил (консервативдүү) диниятчылардын таасири солгундап бараткандыгы байкалат.

Исламдык кыймылдарды изилдеген Делавэр университетинин профессору Муктадер Ханды угуп көрсөк:

– Араб дүйнөсүндө Сауд Аравиясы обочодо (изоляцияда) калып баратат. Ал эми демократия, эркиндиктер жана теңдик нормага айланууда. Эгер Египетте демократия орносо, демократия араб дүйнөсүндө нормага айланат. Ал эми демократияга кастарын тиккен өлкөлөр өз аймагында турмуштан артта калгандардын катарына кошулат. Сауд Арабиянын бийликтери, бул өлкөнүн диниятчылары да ушундан коркуп жатышат.

Бүгүнкү глобалдашкан дүйнөдө бүтүндөй мамлекет бир ууч топту ээрчип калышы кыйын - көпчүлүктүн көзү ачылган, интернеттен баарын көрүп турушат.

Ошондуктан, Бакир уулу менен Ошурахунованын кайым айтышында козголгон маселелерди кеңири мерчемден карап, бул талаштар кылымдардан бери жүрүп келаткан өлкөлөрдүн өкүлдөрүнүн пикирлерин угуп көрсөк.

Ален Куаноңдун Бакир уулуна жообу: Атеистте да адеп бар

Ален Куаноң - 2005-2009-жылдары Франциянын Кыргызстандагы элчиси болгон.

Мындан 300 жылдан ашык мезгил мурда абсолютизмге, анын ичинде чиркөөнүн чексиз бийлигине каршы көтөрүлгөн Франция бүгүн да мамлекет динден бөлүнгөн системанын түркүгү бойдон кала берүүдө.

Куаноң секуляризмдин шартында адеп-ахлак начарлап кетет деген ырастоого таң калганын жашырган жок.

Анын пикиринде, секуляризм Францияда башка өлкөлөрдөгүдөн көп бузукчулук жараткан жок:

- Сауд Аравиясы дүйнө эң көп порнофильм импорттогон өлкө. Араб өлкөлөрүндө сойкулук бар. Египетти, Тунисти алсаңыз, бул өлкөлөрдү коррупция чырмап алган. Секуляризмдин буга эч кандай тиешеси жок, бул цивилизациянын деңгээлине көз каранды маселе. Ошондуктан коомдугу терс көрүнүштөрдү секуляризм менен байланыштырган туура эмес.

Ал эми динге ишенген адам башка динге ишенген адамдан, же бир да динге ишенбеген адамдан жогору турабы?

Агер андай болсо, эмне үчүн Европада тазалыктын, адеп-ахлактын таянычы саналган христиан чиркөөсүн мамлекеттик башкаруудан четтетип, анын таасирин чектеп койду?

Элчи Европада көп кылымдар бою өкүм жүргүзүп турган чиркөө өзүн пакизалыктын жеткен чеги катары көрсөтө албагандыгын эскертип, буларды кошумчалады:

- Чиркөөсүз деле адеп-ахлак күтсө болот, тескерисинче, чиркөөнүн өзүндө ууру-кескилер болушу мүмкүн. Мен мисалы атеистмин.

Исламдык өлкөлөрдө ислам дини бар, бирок коррупция да бар, сойкулук да бар.

Бул жагынан алар биздей эле, бирок бизден өйдө эмес.

Европалык секуляризмдин башатында мусулман турган

Секуляризм түшүнүгү бир беткей эмес. Америка Кошмо Штаттарында секуляризм алтургай динди мамлекеттен кордогон система деп кабыл алынат.

Мамлекет менен динди бөлөк кармоо идеясынын башаты байыркы Рим аалымдарына барып такалат.

Бирок орто кылымдарда Европада бул системанын негиздөөчүсү - мусулман аалым, азыркы Испаниянын аймагын бийлеп турган араптардын Кордоба халифатында жашаган Ибн Рушт (латынча Аверроэс) болгондугун көпчүлүк биле бербейт.

Маектешибиздин сөзү боюнча, атеист сөзсүз эле секуляримзди колдобойт. Атеист, мисалы, динге каршы болушу ыктымал.

Бирок секулярдык системанын колдоочусу динчил адам болуп туруп да, диндин мамлекетке киришүүсүн туура көрбөшү мүмкүн:

- Көп кишилер атеизм менен секуляризм бир эле нерсе деп эсептешет. Секуляризм - атеизм эмес, бул - мен мамлекеттик кызматкер катары дин менен ишим болбошу керек дегенди билдирет. Элдер динге ишенеби, жокмун, бул менин ишим эмес.

Мамлекеттин кызматчысы катары менен коомдун турмушуна диндин аралашпоосун камсыздашым керек. Бул динге каршы дегенди билдирбейт, каалаган динин карманышсын. Бирок дин менен коом бир биринен бөлөк болушу керек.

Кыргызстанда секулярдык системанын колдоочулары өз турумун мыйзамга таянып коргоп калууга үмүттөнүшөт, бирок эгер парламентте радикал диниятчылар жана алардын колдоочулары басымдуулук кылып кетсе, мыйзам тез эле өзгөрүп кетиши мүмкүн.

Бакир уулу: "Аялды күйөөсү тарбиялайт"

Кыргызстандык исламчылар азыртадан эле аялдарды жаш баладай алсыз жан катары көрсөтүп, "ошон үчүн аларды коргош керек» деген ураандын астында, аларды иш жүзүндө коомдук мейкиндиктен сүрүп чыгарууну талап кылышууда.

Буга бүгүн сөз болуп жаткан «Ыңгайсыз суроолор» программасында депутат Турсунбай Бакир уулунун иш жүзүндө өз оппонентин аял катары кордогон сөздөрүн мисалга келтирсек:

Турсунбай Бакир уулу: - Тобо кылдым, сиздин күйөөңүз барбы?
Динара Ошурахунова: - Бар.
Турсунбай Бакир уулу: - Тарбиялаганбы сизди? Күйөөңүзгө айтып коюңузчу, сизди тарбияласын, киши менен кандай сүйлөшүш керек экендигин (үйрөтсүн).
Динара Ошурахунова: - Менин күйөөмө тийишпеңиз. Мен сиздин көп аялыңызга тийишкен жокмун.

(Бул сыналгы берүү 2011-жылдын 12-январында КТРК тарабынан обого чыккан.)

Балким чынында эле аялдар коргоого муктаж, алсыз жандыр?

Бул суроомо франциялык элчи билим берүү системасы жогорку деңгээлде өнүккөн жана социалдык кепилдиктер болгон өлкөдө аялдар теңдикте жана күйөөсү менен эриш-аркак өмүр сүрөөрүн белгилеп, буга өзүнүн жеке турмушун мисалга келтирди:

- Эгер аял иштеп, өз жанын бага албаса, анда, албетте, күйөөгө чыгышы керек. Иштейин десе билими жок, же жумуш орундары жок. Францияда кыздар эркек балдардай эле билим алып, иштей алышат. Менин аялым, мисалы, боюнда бар кезинде да иштеп жүргөн. Бардыгы иштешет. Албетте социалдык система бар, ал аялдарга иштеп да, эне да болууга мүмкүндүк берет.

СӨЗ СОҢУНДА

Парижде мен тунистик активист айымга да жолуктум.

Ханем Бен Милед мекенинде президент Бен Алинин качышы менен аяктаган демонстрацияларга активдүү катышкан.

Кезегинде өмүрлүк жолдошу Мустафа сыяктуу эле Францияда билим алган Бен Милед Тунисте тиш доктур болуп иштейт.

Жашы алтымышка таяп калган активист менен баарлашуудан мен ашынган исламчылардан чочулоодо Кыргызстан жалгыз эмес экендигин түшүндүм.

Бен Милед менен маек:

Коалициядагы кризис

Жазгы талаа жумуштары башталаар алдында Кыргызстанда жылдагыдай эле саясий кризистин эпкини келе баштады. Саясий кризистин биринчи толкуну “Ата Мекен” партиясынын “Республиканын” лидери Өмүрбек Бабановду коррупцияга байланыштуу айыптоосу менен келди.

Орусиянын Мамлекеттик Думасынын депутаттарынын ошол эле Бабановду “Мегаком” боюнча айыптоосу, ага кошул-ташыл моралдык сокку болуп калды.

“Ата Журт” фракциясынын жоон топ депутаттарынын коалиция жетекчилигине нааразычылыгы башкаруучу коалиция тароо алдында экенин тастыктагансый.

“Республиканын” демилгеси менен түзүлгөн коалициянын курамында 77 депутат бар. Коалициянын бузулушу үчүн кеминде 17 депутат андан чыгууга тийиш. “Ата Журттун” депутаттары тастыктагандай, коалициядан чыгууга 19 депутат даяр турат. Ошондуктан коалициянын бузулушу өтө реалдуудай көрүнөт.

“Ата Журт” фракциясынын мүчөсү Марат Султановдун айтымында, мына ушул катаал реалдуулук өкмөт башчы менен анын биринчи орун басарын 11-мартта парламентке келүүгө аргасыз кылды:

- Премьер-министр өзү келсе, биринчи вице-премьер-министр убакыт таап келип атса, анда өзүңөр деле мындай бүтүм чыгарсаңар болот. Ачыгын айтканда 19 добуш бар. Бул коалицияны бузууга жетет.

“Ата Журттун” коалициядан чыгууга даярдыгын билдирген депутаттары "өкмөт башчы жана биринчи вице-премьер-министр биз менен кеңешпей, эсептешпей, биздин пикирди укпай жатат" деген дооматтарды коюшкан. Андан сырткары өкмөт башчы коалиция куралып жатканда убада кылгандай бир айдан кийин өкмөттүн жаңы структурасы сунушталган жок. Алмазбек Атамбаев коюлган дооматтарды негиздүү деп таап, кечирим сураган.

“Ата Журт” фракциясынын мүчөсү Нариман Түлеев коалиция оор абалда турганын тастыктады:

-22сине чейин убакыт бердик. Коалиция боюнча катуу сөз болду. Депутаттар айткандай чын эле коалициянын тагдыры кыл учунда турат. Көп суроолорду койдук. Ошол суроолорду 22-мартка чейин аткарбаса, анда биз коалициядан чыгабыз деген талапты койдук.

“Ата Журт” фракциясы өзүнүн жабык жыйынында кабыл алган чечимдерди жарыялаганга чейин “Республиканын” өкүлү Канатбек Исаев коалиция тараган жок деп билдирген эле:

- Көпчүлүктү түзгөн фракциялардын Жогорку Кеңештеги коалицияда буга чейин да суроолор болгон. Бүгүн да ошондой суроолор пайда болуп, сүйлөшүүлор болду. Бирок коалиция тарайт деген сөздөр чындыкка жатпайт.

Бирок Канат Исаевдин сөзү бүгүнкү күнгө карай чындык болгон менен, ал жакынкы күндөрү тескерисинче айланып кетиши ыктымал.

Башкы себеп президенттик шайлоодобу?

Коалициянын кыйроосунун башкы себептеринин бири - алдыдагы президенттик шайлоого байланыштуу. Парламенттеги фракциялар ал шайлоого өз талапкерлерин катыштырууга аракет жасашууда. “Ата Журт” фракциясы өз талапкерин тандап алганын, бирок анын ысымы азырынча айтылбай турган билдирди.

Президенттик шайлоого катышууну көздөгөн фракциялар жана парламентке кирбей калган күчтөр өкмөт башында турган саясатчынын президенттик шайлоого катышпай, адилет жана таза шайлоонун өтүшүн камсыздаш керек деген турумда болууда. Алар өкмөт башчы президенттикке талапкер болсо административдик жана башка ресурстарды пайдаланат, натыйжада талапкерлер ортосунда адилет таймаш болбойт деген пикирде турушат.

Өкмөт башчы Алмазбек Атамбаевдин президенттик шайлоого катышары күтүлүп турат. Ал эмес башкаруучу коалициянын макулдашуусунун жашыруун бөлүгүндө Атамбаев президенттик шайлоого кетсе, анын ордуна өкмөт башчылыкка Өмүрбек Бабанов келери макулдашылганы кабарланууда.

Өкмөт башчы президенттик шайлоого катышпайт деген формулага “Ар-намыстын” лидери Феликс Кулов макул болууда. Ал өкмөт башчылыкка барууга даярдыгын, ал эми президенттик шайлоого катышпасын билдирүүдө.

Өкмөт башчы шайлоого катышпаган көрүнүш Кыргызстанда өткөн жылы парламенттик шайлоо учурунда колдонулуп, өлкөдө салыштырмалуу таза жана адилет шайлоо өтүүсүнө шарт түзгөнү эл аралык жана жергиликтүү байкоочулар тарабынан белгиленген.

АКШга сапар

Ички саясатта мына ушундай буркан-шаркан окуялар болуп жаткан аптада тышкы саясатта да олуттуу окуялар орун алды. Президент Роза Отунбаева бир нече күнгө созулган сапар менен АКШда болуп, ал жерде президент Барак Обама баш болгон АКШнын алдыңкы жетекчилери менен жолугушууларды өткөрүп келди.

АКШга сапар учурунда президент Роза Отунбаевага Кошмо Штаттардын Мамлекеттик департаментинин “Каарман аял” сыйлыгы ыйгарылды. Бирок ал Мутабар Тажибаеванын кадамы менен оңтойсуз учурга кабылды. Өзбекстандык укук коргоочу Тажибаева 2007-жылы “Каарман аял” сыйлыгын алган. Ал Роза Отунбаевага сыйлыктан ыйгарылышына кескин каршы чыгып, ал эмес өзүнө берилген сыйлыкты тапшырарын билдирип чыкты. Тажибаева Роза Отунбаева июнь коогалаңында өзбек тектүүлөрдү коргоого чара көрбөдү деп нааразыланууда.

Бирок саясий жактан алганда Роза Отунбаева Кошмо Штаттардан толук колдоо алганы маалым болууда. Вашингтон Кыргызстанга демократияны чыңдоо, коопсуздукту бекемдөө багытында жардамын аябасын билдирүүдө.
Баткенде база курулат

Отунбаева жолугушуулардын биринде Кыргызстан Баткенде антитеррордук машыгуу борборун курууга жана чек ара кызматын бекемдөөгө АКШдан каражат сурап жатканын жашырган жок:

- Баткенде база куруу күн тартибинде калып жатат. Мен кыргыз-тажик чек арасына санаам өтө тынч эмес. Бул маселе боюнча биз Москва менен да иштешип жатабыз. Бирок АКШ да жардам караштырып жатабыз. Биз антитеррордук машыгуу борборун курууну каалайбыз. Биздин чек ара кызматы да өтө олуттуу жардамга муктаж.

Президент Роза Отунбаева менен АКШ президентинин атайын жардамчысы Майкл Макфоллдун жолугушуусунда, Макфолл мырза АКШ тарап коопсуздукка байланыштуу бир катар долбоорлорду жакын арада сунуштаарын билдирген.

Талдоочулардын баамында, ал долбоорлордун арасында Баткенде антитеррордук машыгуу борборун куруу болуп калышы мүмкүн. Анын үстүнө бул долбоордун ишке ашыруу боюнча Кыргызстан менен АКШ өткөн жылы эле иш баштап, бирок токтоп калган.

Кошмо Штаттардын Бишкектеги элчилиги өткөн жылы март айында борборду куруу үчүн 5.5 млн. доллар бөлүнөрүн билдирген.

Талдоочу Валентин Богатырев антитеррордук борборду АКШ кура турган болсо Кыргызстандын бул жактагы өнөктөштөрүндө суроо пайда болушу мүмкүн деп эсептейт:

- Баткенде антитеррордук машыгуу борбордун курулушу Кыргызстан үчүн жакшы. Бирок биз жакшы билебиз, антитеррордук борбордо ар кандай багыттагы адистер болот. Алар машыктыруу эле эмес, башка иштер менен да алектенет деген күмөндөр болот. Ошондуктан Орусия, Кытайда кооптонуулар болот. Сөзсүз болот. Анын үстүнө Орусия өзү да биздин түштүктө баңги заттарын ташууга каршы борбор курууга кызыкдар болуп келатат.

Президент аппаратындагы стратегиялык талдоо жана мониторинг бөлүмүнүн жетекчиси Орозбек Молдалиев америкалыктар Баткенде антитеррордук борбор курушуна орус тарап каршы болбош керек деген пикирин айтты:

- Эгерде чек аранын коопсуздугу сакталса орустарга жаман болобу - маселе мына ушунда. Өздөрү айтып жатат, "Баткенде чек араңарды тоспосоңор наркобизнесиңер каптап кетти, террорчулар келип атат, мунун баары түз Москвага келип атат" деп бизди коркутуп атпайбы. Баткенге антитеррордук борбор курулса ал жалаң эле Кыргызстан үчүн болбойт. Ал регионалдык борбор болот.

Молдалиев Орусия өзү АКШ менен мамилесин оңдоп жатканын кошумчалады.

Жогорку Кеңештин коопсуздук жана коргонуу боюнча комитетинин мурунку төрагасы, генерал Рашид Тагаев мындай иштерде абдан этият болуу керек деген пикирин айтты:

- Мунун артында өтө көп саясат, оюндар бар. Муну жакшы талдап, ойлоп, кыргызда айтылгандай “жети өлчөп, бир кесиш керек”. Биз ири уюмдарга мүчөбүз. ШКУга, ЖККУга киребиз. Булардын көз карашы бөлөк деп ойлойм. Ошон үчүн азыраак зыян алып келе тургандай кылып, "кичинээрек бир бармакты кесиш" керек. Ар түрдүү көз караштар, тирешүүлөр, оюндар болуп калышы мүмкүн. Ошон үчүн муну акыл-эс менен калчап, макулдашып, анан кийин кылса болот эле деген ойдомун.

Искак Масалиев акталды

Коалиция ичиндеги окуялар (коррупция боюнча териштирүүлөр ж.б.) жана 1-май райондук сотунун Искак Масалиев жана Үсөн Сыдыков боюнча чечими Кыргызстан өзгөрүү жолунда экенинен кабар берди. Булардын ар бири Кыргызстан үчүн белги бере турган окуялар.

Анткени мурдагы президенттер учурунда коррупция боюнча айыптоолор тийиштүү натыйжасыз, парламентте кеңири талкуусуз, талкуу болсо да олуттуу иликтөөсүз кала берчү. Көбүнэсе “жабылуу аяк жабылуу” бойдон калчу. Маселен, "Манастагы" май куйуучу ишкерликте коррупция боюнча Акаевдин уулу Айдар Акаев, күйөө баласы Адил Тойгонбаев, андан кийин Курманбек Бакиевдин уулу Максим Бакиев шектелип, бирок жабык бойдон калып келген.



7-апрелдеги окуядан кийин Убактылуу өкмөттүн айрым жетекчилери, азыр бийлик башында тургандар Транзиттик борбордогу кирешелүү ортомчулукту колдон чыгарбай келди. Бирок ал көзөмөлдөө алардын башына “таяк” болуп тийчүдөй болуп турат.

Мурунку президенттер учурунда саясий оппоненттерди абакка салуу өнөкөт болуп келген. Акаев учурунда Феликс Кулов, Азимбек Бекназаров отургузулду. Курманбек Бакиев кезинде Исмаил Исаков сегиз жылга кесилди.

Ал эми азыркы бийликке кайсы бир деңгээлде саясий оппонент болгон Искак Масалиевди сот актады. Үсөн Сыдыков болсо шартту түрдө кесилди. Алар өткөн жылы май айындагы башаламандыкка байланыштуу оор беренелер боюнча айыпталып жаткан эле.

Искак Масалиев өзү соттун өкүмүн күтүлгөн чечим катары баалады:

- Бул күтүлгөн чечим болчу. Анткени мыйзамды, тергөө дегенди түшүнгөн адамга мындан башка чечим болушу болбойт эле. Ошондуктан мен ыраазычылыкты билдирем. Ал эми саясий күрөштү улантып аткам, мындан ары да улантамын.

Мамлекеттик айыптоочу Искак Масалиевди 14 жылга эркинен ажыратууну соттон сураган эле.