Экономика

Ош шаарынын кызматтан кеткен биринчи вице-мэри шаар башчысы Таалайбек Сарыбашевди жана ал жетектеген мэриянын иш жүргүзүүсүн сындап чыкты.

2 ай мурун кызматка келген Ош шаарынын биринчи вице-мэри Жылдызбек Турганбаев кызматтан кетип, анын ордуна мурунку губернатор Байыш Юсуповдун баласы Замир Юсупов келген.

Жергиликтүү кеңештерге шайлоонун алдында кызматкерлердин алмашуусу коомчулукта талкууга алынып, Турганбаев болсо иштен негизсиз эле алынып калганын айтып чыкты.

«Саясий көз карашыбыз келишпейт экен»

Мурунку биринчи вице-мэр Жылдызбек Турганбаев 5-март күнү Адыл Акжол уулунун "Ютубдагы" каналына интервью берип, мэр менен саясий кызыкчылыктары туура келбей калганы үчүн иштен кетүүгө аргасыз болгонун айтып чыкты:

«"Экөөбүздүн саясий көз карашыбыз, кызыкчылыктарыбыз келишпейт экен" деп түшүндүрдү. "Шайлоодон кийин Жылдызбек Тургунбаев мэр болот" деген сөздөр чыгып кетти. Сен элди экиге бөлүп жатасың, мага шайлоонун алдында бул нерсе керек эмес. Ошондуктан сен арызыңды жазып кет же болбосо мен өзүм берене менен кетирем" деп айтты».

Дагы караңыз

Оштогу так талаштар

Ал ошондой эле жаңы биринчи вице-мэр дайындалганы тууралуу маалыматты Интернеттен окуганын айткан.

Турганбаевдин маеги чыккан күндүн эртеси эле мэриянын басма сөз катчысы Азамат Абсаттаров "Фейсбуктагы" баракчасы аркылуу түз эфирге чыгып, анын айткандарын төгүндөп, ал иштен мыйзамдын негизинде кеткенин маалымдады:

«Жеке сүйлөшүүлөрү жөнүндө маалыматтарды билбейм. Өзүнүн арызы менен кызматтан кеткенин билем. Анчалык эле чоң саясатка айландыруунун кереги жок. Бул шайлоо алдындагы кадрларды алмаштырууга да тиешеси жок. Кечээ "вице-мэрлер мэрдин сөзүнөн чыкпайт" деп айтып жатат. Бул логикага да жатпайт. Эртең партиялардын тизмелери чыкканда көрөсүңөр, Ош шаарындагы вицелер кайсы партиялардан кетип жатканын».

Биринчи вице-мэр шаардагы экономика тармагына жооптуу. Турганбаев жумушка жаңы дайындалганда аны тажрыйбалуу адис катары сыпатташкан.

Жылдызбек Турганбаев 2019-жылдын июль айынан бери Мамлекеттик салык кызматынын төрагасынын кеңешчиси болуп иштеп турган. Ага чейин түштүк аймагы боюнча, Ош шаарында, Өзгөн, Ноокат райондорунда салык кызматын жетектеген.

«Бюджет көбөйгөн жок»

Турганбаев интервьюсунда мэриянын экономикалык саясатын сынга алып, шаардын бюджети көбөйбөй жатканын айткан:

«Ош шаарынын 2021-жылкы бюджети 1 миллиард 370 миллион сом деп кабыл алынды. Былтыркы жылга салыштырмалуу 2, 1 пайызга гана өсүш болду. Бул — өсүш эмес. Бюджетти түптөй турган бардык булактарды инвентаризация кылыш керек эле».

Шаар бийлиги буга чейин бюджеттеги каражаттын көбөйбөй жатканын пандемияга байланыштырган.

Турганбаев муниципалдык ишканаларда каражаттар уурдалып жатат деп шек санап, ага ошол ишканадагы кызматкерлердин айлыгы аз болгонун себеп катары көрсөттү. Бирок аны мэриянын басма сөз кызматы четке кагып, Турганбаев минималдуу айлык акыны жалпылаштырып айткан деди. Кеп кайрадан Абсаттаровдо:

«Базардагы кызматкер 5 миң сомдон айлык алат. Ошол маселени көтөрүүдө пикир келишпестик болуп калганы жалган. "Жапалак" автоунаа базары менен Оштогу борбордук базарда иштегендердин айлыгын көрсөңөр болот. 10 миң, 14 миң, 17 миң сом деп турат. 5 миң сом айлык алган кароолчу, пол жуугандар да бар», — деп айтты маалымат катчысы.

Дагы караңыз

Оштун мэрин жандаган спортчу кызматка келди

«Биримдиктин» талапкери — биринчи вице-мэр

2-март күнү мэр Таалайбек Сарыбашов Замир Юсуповду биринчи вице-мэр кылып дайындады. Мэриядан ал мекеменин ичинен каралган эки талапкердин бири болгонун, мурунку иш тажрыйбасы эске алынып кызматка коюлганы кабарланды.

Юсупов — он жылга чукул мамлекеттик администрацияда иштеген Ош облусунун мурдагы губернатору Байыш Юсуповдун баласы. Анын эжеси Салтанат Аматова - Ош шаардык билим берүү башкармалыгынын жетекчиси.

Замир Юсупов 2020-жылы жергиликтүү кеңештерге шайлоодо «Биримдик» партиясынын Ош шаарындагы координатору болуп турган. Ошол эле жылы 12-апрелге дайындалган Ош шаардык кеңешине депутат болуу үчүн «Биримдик» партиясынан №23 катарда талапкер болгон.

«Интербилим» коомдук бирикмесинин Оштогу өкүлү Гүлгаакы Мамасалиева Жылдызбек Турганбаевдин сын-пикирлери туура экенин, аны мэр өзүнө атаандаш кылбоо үчүн алып салышы мүмкүн деди:

«Турганбаевдин сынына кошулам. Мэр жеке өзү чечимдерди кабыл алат, анын уруксатысыз эч нерсе ишке ашпайт деген чын. Жумуштар бөлүштүрүлүп берилген эмес. Буга чейин Жылдызбек мэр болуп калышы мүмкүн деген сөз болгон. Мэр атаандаштыктан коркту. Аны менен макулдашпай, чечимдерди кабыл ала баштаган болсо керек. Анан бул мэрге жакпай, аны алдырып салды. Ошол үчүн чогуу иштеген, мэрдин сөзүнөн чыкпаган Замир Юсуповду коюп койду».

Энергетика жана өнөр жай министрлиги өлкөдө күйүүчү май дагы 10 сомго чейин кымбатташы мүмкүн экенин эскертти. Жыл башынан бери Кыргызстанда мунай наркы күн сайын өсүп бензин 32 сомдон 45 сомго жетсе, дизел 40 сомдон ашты.

Кымбаттоонун беш себеби

Кыргызстанда бензиндин литри 50 сомго, дизел 45 сомго чейин кымбатташы мүмкүн. Энергетика жана өнөр жай министрлиги күйүүчү жана майлоочу май наркынын өсүшүнүн себептерин атады:

• Дүйнөдө мунайдын баасы өстү;
• Пандемияга байланыштуу Орусияда мунай заводдорунун өндүрүшү азайды;
• Орусияда жазгы талаа иштерине байланыштуу күйүүчү майга суроо-талап өстү;
• Орусияда күйүүчү жана майлоочу майларга акциздик салык жогорулады;
• Кыргызстанда сомдун долларга карата куну түштү.

Парламенттин отун-энергетикалык комплекси жана жер казынасын пайдалануу боюнча комитетинин 9-марттагы отурумунда энергетика жана өнөр жай министринин орун басары Айтмамат Кадырбаев күйүүчү май боюнча сандарга токтолду.

«Маалымат боюнча Орусиянын мунай заводдорунда 1 тонна бензин үчүн 100-150 долларга чейин көтөрүлөт. Демек, Кыргызстанда 7 сомдон 10 сомго чейин жогорулашы мүмкүн. Ал эми дизел заводдордо 40-60 долларга чейин көтөрүлсө, бул Кыргызстанда 3 сомдон 4 сом 80 тыйынга чейин жогорулашы мүмкүн дегенди түшүндүрөт».

Азыр Бишкектеги май сатуучу жайларда АИ-95 бензини 44 сом 90 тыйын, АИ-92 үлгүсүндөгү бензин 42 сом 50 тыйын, АИ-80 36 сом 90 тыйын болууда. Дизелдин бир литри 40 сом 90 тыйындан сатылып жатат. Жалпы жолунан январь айынан тартып бензин жана дизелдик күйүүчү майдын баасы 14% жогорулады.

Айрыкча жазгы талаа иштери кызый баштаганда күйүүчү майдын баасынын күн санап өсүшү дыйкандарды убайымга салды. Чүйдөгү ири фермерлердин бири Манас Саматов агынан жарылды.

«Айла жок сатып алабыз. Күн сайын кымбаттап жатат. Мындай улана берсе чапаныбызды желкеге илип, чет мамлекетке чыгып кетебиз го. Дыйкан калбайт, анан кымбатчылык басат. Өтө тездик менен ушуга бара жатабыз. Мисалы, кант кызылчасын айдоо 16 миң гектардан 8 миң гектарга түштү. Эмне болду? Кумшекердин баасы асманга чыкты».

Эмнеге мунайды Орусиядан гана алабыз?

Кыргызстан жылына 1 млн. 200 миң тонна күйүүчү май керектесе, анын 20% гана жергиликтүү мунай заводу жабат. Пандемияда кыргызстандык заводдор дээрлик иштеген жок. Демек, толук Орусиядан ташылып келүүдө. Жогорку Кеңештин комитет жыйынында депутат Бейшенаалы Нурдинов күйүүчү май импорту эмнеге бир гана өлкөдөн көз каранды экенине кызыкты.

«Эмнеге биз Орусиядан гана алабыз? Иран, Түркмөнстан, Азербайжан деген бар. Алардан алсак болбойбу?».

Депутаттын бул суроосуна Кыргызстан мунай ташуучулар бирлигинин аткаруучу директору Канат Эшатов минтип жооп берди.

«Бүгүнкү күндө Орусиядан алган ыңгайлуу. Өкмөт аркылуу келишим менен өлкөдөн чыгарууда бажы төлөмү жок берилет. Маселен, Казакстан менен деле ошондой келишим түзөлү деп төрт жылдан бери сүйлөшүү бүтө элек».

Майдын баасын арзандатса болобу?

Кыргызстанда күйүүчү майдын баасы кандай аныкталарын түшүндүрүп берели. Маселен, 1 литр бензиндин баасын 45 сом деп алсак, анын 55% башкача айтканда 24 сом 75 тыйыны заводдон сатып алынган сумма.

Мамлекетке төлөнүүчү салыктын түрлөрү, ташып келүү жана башка чыгымдары 43,5%, сом менен айтканда 19 сом 57 тыйын. Ал эми 1 литр бензиндин баасы болгон 45 сомдун киреше пайызы 1-1,5 - башкача айтканда 0, 67 тыйын болуп эсептелет.

Кыргызстан мунай ташуучулар бирлиги күйүүчү майдын баасын убактылуу кармап туруу үчүн акциздик салыкты төмөндөтүүнү сунуш кылып келет. Кыргызстанда акциздик салык катары бензиндин тоннасына (литрине 4,12 сом) 5000 сом алынат.

Кыргызстан мунай ташуучулар бирлигинин аткаруучу директору Канат Эшатовдин пикиринде ата мекендик өндүрүштү иштетүү менен гана мунайды элге жеткиликтүү баада сунуштоого болот. Ансыз импорттон көз каранды товардын баасын көзөмөлдөөдө мүмкүнчүлүк аз.

«Кыргызстанда тогуз завод бар. Тогуз заводдун кубаттуулугу 2 млн. тонна мунай өндүрүүгө жетет. Тогуз завод толук кандуу иштесе көз карандылык азаймак. Чалгындоо жүргүзүлгөн мунай аймактары бар. Жок дегенде 50% өзүбүздү камсыздоого жетсек, бааны көзөмөлдөө оңой болмок», - деди Эшатов.

Евразиялык Экономикалык Биримдикке кирген өлкөлөрдүн ичинен Казакстанда күйүүчү май эң арзан өлкө болуп саналат. Кыргыз өкмөтүнүн 1-мартагы расмий маалыматына ылайык, Кыргызстанда - АИ-92 үлгүсүндөгү бензиндин литри 40,9 сом болсо, Казакстанда – 31,5 сом, Орусияда – 50,5 сом, Беларуста – 56,7 сом, Арменияда – 61,5 сом деп эсептелди. Бирок бул өлкөлөрдө орточо айлык Кыргызстандан бир аз жогору экени белгилүү.

2025-жылы ЕАЭБ биримдиктеги өлкөлөрдө күйүүчү майдын баасын бирдей кылуу жөнүндө сүйлөшүү жүрүп жатканы кабарланган. Кыргызстанда катталган автоунаалардын саны 1,5 миллиондон ашкан. Алардын дээрлик бардыгы күйүүчү майды керектейт.

GlobalPetrolPrices.com эл аралык порталынын 2021-жыл 8-февралдагы маалыматына ылайык, мунайдын баасы боюнча 181 өлкөнүн ичинен Кыргызстан 12-орунда турат. Сайттын маалыматында сырттан мунай импорттогон мамлекеттердин арасынан күйүүчү майдын баасы арзан деген рейтингде Кыргызстан биринчи орунда турганы жазылат.