“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
16-апрелде Нарын шаардык ички иштер бөлүмүнүн абагында каза тапкан Бектемир Акуновдун өлүмү боюнча жергиликтүү соттук медициналык экспертиза анын өлүмү муунуудан улам болгон деген жыйынтыгын чыгарды. Бирок маркумдун жакындары сотмедэкспертизанын мындай тыянагына макул эместигин билдиришүүдө. Алар акыйкаттык издеп, президент менен өкмөт башчыга жана эл аралык адам укугун коргоочу уюмдарга кайрылаарын айтып жатышат.
Кеминдеги шайлоого байланыштуу Биринчи май райондук сотунун чечимине нааразылыктар болууда. Бул шайлоого көз карандысыз байкоочу катары катышкан укук коргоочулар бүгүн маалымат жыйынын өткөрүп, соттун чечимин адилетсиздик жана саясий оюн катары бааларын билдиришти.
Кыргызстандагы туроператорлордун ассоциациясы Евробиримдикке кирген өлкөлөрдүн жарандары үчүн Кыргызстанга визасыз кирүү эрежесин камсыздоого жетишүүгө аракет жасоодо. Бул багытта аталган ассоциация эларалык ишкерлер кеңеши менен бирдикте атайын токтомдун долбоорун түзгөн. Туроператорлордун айтуусунда мындай эреже өлкөгө келүүчү туристтердин агымын күчөтмөк.
Барскоон кырсыгынан жапа чеккен айылдардын тургундары Кумтөр кенине кеткен жолду эки жумадан бери эки жеринен тосуп турушат. Бүгүн түштөн кийин аларга президенттин алдындагы адам укугун коргоо комиссиясынын төрагасы Турсунбек Акун, Ысыккөл облусунун губернатору Кыдыкбек Исаев жана кенди иштетип жаткан Канадалык компаниянын өкүлдөрү барып, жолугушту.
5-май эгемен Кыргызстанда Конституцияны кабыл алган күн катары саналат. Айрым талдоочулар акыркы убактарда Конституция күнүнө анча маани берилбей калгандыгын белгилеп, муну Башмыйзамды сыйлоо аң-сезимден чыгып кеткени менен байланыштырууда. Ошол эле убакта Конституцияга өзгөртүү жана кошумча киргизүү тууралуу мыйзам долбоорунун каралышы создуктурулуп жаткандыгы айтылууда.
Бүгүн жарандык коом өкүлдөрү чогулуп, коомдук телеканалдын Байкоочу Кеңешине шайлануучу беш өкүлдү шайлоо маселеси тууралуу талкуу уюштурду. Анткени президент кол койгон мыйзам боюнча Байкоочу Кеңештин беш мүчөсү атуулдук коомдон шайланууга тийиш. Айрымдар коомдук телеканалдын ишин көзөмөлдөөчү органга жарандык коомдун атынан бийлик өз кишилерин алып келүүгө аракет жасоосу мүмкүн деп чочулашууда.
Бириккен фронттун штаб башчысы Өмүрбек Субаналиев, “Ата мекен” партиясынын мүчөсү Өмүрбек Абдрахманов жана “Канжар” кыймылынын лидери Адилет Айтикеев Улуттук коопсуздук боюнча мамлекеттик комитеттин камагында жатышат. Буга байланыштуу эки күндөн бери Бишкекте укук коргоочулар пикет уюштурууда. Таласта Өмүрбек Субаналиевдин жердештери анын камактан бошотулуусун талап кылып, митинг өткөрүшүүдө. Кечээ кечке жуук Башкы прокуратура камактагы фронтчуларды эки айга камоого санкция берди.
Апрель митингдерин уюштурган Бириккен фронттун штаб башчысы Өмүрбек Субаналиев менен “Ата мекен” партиясынын мүчөсү Өмүрбек Абдрахманов Улуттук коопсуздук боюнча мамлекеттик комитеттин камагында отурганына бүгүн үч күн болду. Бириккен фронттун жаш канаты “Канжар” оппозициялык кыймылынын лидерлеринин бири Адилет Айтикеев кечээ Башкы прокуратуранын санкциясы менен эки айга абакка алынды. Буга байланыштуу бүгүн бир нече коомдук уюмдардын жана жаштар кыймылдарынын өкүлдөрү Коопсуздук комитетитинин имаратынын алдында, андан кийин Өкмөт үйүнүн алдында пикет өткөрүп, камактагыларды бошотууну талап кылды.
Коомчулук өкүлдөрү апрель митингдеринен кийин кыргыз бийлиги сөз эркиндигине кысым көрсөтө баштады деп тынчсызданышууда. Буга “Агым”, “Кыргыз руху”, жана “Апта” гезиттеринин 20-апрель күнкү саны башкы прокуратура тарабынан тартылып алынганы түрткү берди. Ал эми мамлекеттик катчы Адахан Мадумаров сөз эркиндигине эч кандай кысым болгон жок деп белгилөөдө.
19-апрелде оппозициянын митинги күч менен куулуп таратылгандан кийин, митингдин уюштуруучулары жана кээ бир катышуучулары күч органдарына сурак берип жатышат. Укук коргоочулар милициянын убактылуу камоочу жайларында 150гө жакын киши кармалып жатканын айтышууда. Ал эми айрым саясатчылар саясий кризистен репрессия жолу менен эмес, сүйлөшүү жана келишүү жолу менен чыгууну сунушташат.
Бүгүн Улуттук коопсуздук боюнча мамлекеттик комитет Бириккен фронттун, “Ар Намыс”, “Ата Мекен” партияларынын кеңселерин тинтүүгө алып, фронттун бир нече мүчөлөрүн суракка алды. Кечээ түн ичинде “Агым”, “Апта” жана “Кыргыз руху” гезиттерин басууга Башкы прокуратура тыюу салган. Ал эми милиция тарабынан кармалып, камакка алынган 100 чакты митингчинин дайыны белгисиз болууда. Өлкөдөгү бул акыбалга байланыштуу Кыргызстандагы укук коргоочулар тынчсызданууларын билдирип жатышат.
Мурдагы кабарларда кечээ кечки саат тогузга жакын милиция менен митингчилердин ортосунда кагылышуу болгонун кабарлаган элек. Митингчилердин бир тобун Алатоо аянтына чейин сүрүп келген милиция андан кийин топтолгон элди “Эркиндик” гүлбагына, Токтогул, Байтик жана Панфилов көчөлөрүнө чейин сүрүп кууп чыкты. Ошол эле убакта милиция көздөн жаш агызуучу жана катуу үн чыгаруучу гранаталарды колдонду. Бир саат убакыттан кийин аянттагы бозүйлөр менен чатырларды күч кызматкерлери чечип кетишти.
“Бириккен фронт” уюштурган саясий ачкачылыктын катышуучусу Бектемир Акуновдун өлүмүнүн себептерин изилдеген көз карандысыз комиссия өзүнүн жыйынтыгын жарыя кылды. Алар Бектемир Акуновго тирүү кезинде күч колдонулган, ал эми анын өлүмү муунуудан улам болгон деген тыянак чыгарышты. Бул боюнча көз карандысыз комиссиянын мүчөсү, “Элет” партиясынын жетекчиси, кесиби боюнча дарыгер Накен Касиевди кепке тарттык.
Алатоо аянтында кечки саат төрттөн өткөндө Бириккен фронттун жактоочуларынын митинг акциясы кайрадан жанданды. Митингде айрым маалымат каражаттарынын иши боюнча билдирүү кабыл алынды. Билдирүүдө УТРК өлкөдөгү саясий окуяларды бурмалап көрсөтүп жатат деп айыпталып, анын жетекчисин кызматтан алуу талабы коюлду. Ошондой эле “5 - каналдын” ээси президенттин уулу Максим Бакиев деп аталып, ошондуктан ал маалыматты бир жактуу берип жатат деп белгиленди. «Биз Максим Бакиевдин өз мүлкү боюнча декларация беришин талап кылабыз», - деп айтылат билдирүүдө. Митингчилер алдына Ө.Текебаев, Т.Сариев, М.Эшимканов, Ө.Абдырахманов, З.Эсенаманов, С.Урманаев, Э.Алымбеков, Ч.Жакупова чыгып турушат. Байкоочулар бүгүн митингге келген элдин саны кечээки караганда азайып калгандыгын айтышууда.
Кыргызстандын түндүгүндөгү айрым аймактарда президент Курманбек Бакиевдин отставкасын талап кылган нааразылык митингдери уланууда. Бишкек шаардык кеңеши бийлик менен оппозицияны сүйлөшүүгө чакырган билдирүү кабыл алды. Президент Курманбек Бакиев жалпы элге кайрылуу жасап, баш-аламандыктар болуп кетсе, митингди уюштурган тарап жоопкер болорун билдирди. Оппозиция бул кайрылуусу менен жоопкерчиликтен качып жатат деп президентти сынга алды.
Кыргызстанда мөөнөтсүз митингдер башталды. Бийлик митингдерден пайдаланып, ар кандай күчтөрдүн баш-алмандык түзүп жиберүүсүнүн алдын алып, өлкөдө кырдаалды стабилдүү кармоого аракет жасамакчы. Бул жагдайда президенттин маалымат катчысы Нурлан Шакиев “Азаттыктын” суроолоруна жооп берди.
Бүгүн президент Курманбек Бакиевдин отставкасын жана мөөнөтүнөн мурда президенттик шайлоо өткөрүүнү талап кылган митингдер Нарын, Ысыккөл, Талас жана Чүй облустарынын бир нече шаарларында башталды. Бишкекте ачкачылык акциясы уланууда. Ошол эле учурда бийлик менен оппозицияны элдешүүгө, маселени сүйлөшүү жолу менен чечүүгө чакырган жыйындар да болуп жатат.
Бишкектеги эски аянтта “Бириккен фронттун” мүчөлөрү саясий ачкачылыгын улантышууда. Алар менен түштө өкмөт башчы Алмазбек Атамбаев, кечке жуук Бириккен фронттун жетекчиси Феликс Кулов келип жолугушту. Саясий ачкачылык жарыялагандардын абалы медицина кызматкерлери тарабынан текшерилип жатат.
Кечээ Бишкекте мөөнөтүнөн мурда президенттик шайлоо өткөрүү талабы менен саясий ачкачылык акциясы башталды. Ошол эле күнү бир нече коомдук уюмдардын өкүлдөрүнүн уюштуруусунда тынчтык жүрүшү болду. Жүрүштүн катышуучулары эски аянттагы саясий ачкачылыкта отургандарга келип, ортодо кайым айтышуу болуп кетти. Байкоочулар мындай антимитингдер кырдаалдын ого бетер курчушуна гана алып келет деп эскертип жатышат.
Үстүбүздөгү жылдын март айында эле Кыргызстанда үч журналист сабалды. Укук коргоочулар жана журналисттер менен иш алып барган коомдук уюмдар муну чектен ашкан көрүнүш катары баалап, журналисттердин укугун коргоого бийлик тарабынан чаралар көрүлүүгө тийиш деген талаптарын коюшууда. Байкоочулар Кыргызстанда журналисттер өкмөтчүл жана оппозициячыл деген эки жээкке бөлүнүп калгандыгын белгилеп, бул журналисттердин өз укугун коргоого чогуу аракет жасоосуна кедерги тийгизерин айтып жатышат.
Дагы жүктөңүз
