Пандемияга байланыштуу быйыл чет элдик туристтердин жоктугунан Ысык-Көлдөгү мейманкана бизнеси артка кетти. Кышкы туризмге ылайыкташкан ишкерлер да мурдагыдай эл жоктугун, бир нече мейманкана жабылууга мажбур болуп жатканын айтышууда. 80 миң калк жашаган Каракол шаарында эле 80ден ашык мейманкана бар, демек атаандаштык да күч.
Экономика
жума 15 Январь 2021
Түркмөнстандын Лебап облусунун бийлиги мамлекеттик кызматкерлерди жана мектеп окуучуларын кызыл мыянын тундурмасын (сироп) такай көтөрүп жүрүүгө милдеттендирди. Президент Бердымухамедов демилгечи болгон бул жаңы эрежеге ылайык, бул чөптүн ширеси ар бир кызматкердин кол сумкасында болушу керек.
11-январда "Азаттык" радиосунун түркмөн кызматы өлкөнүн Лебап облусундагы мамлекеттик кызматкерлер жана окуучулар жанына такай кызыл мыянын (солодка) тундурмасын алып жүрүүгө милдеттүү экенин жазып чыккан.
Жарандар бул дaры чөптү коронавирустан коргонуу үчүн ичип турууга да милдеттүү экени маалым болду.
Ошондой эле мындай талапты Фарап районундагы мамлекеттик кызматкерлер дагы аткарууга милдеттүү. Аларга керектүү дары-дармеги болбосо жумушка кире албай турганы эскертилген. Бул жаңы эреже аймактын мектеп окуучуларына да тиешелүү. 18-январдан баштап ар бир окуучунун жанында кызыл мыянын тундурмасы, антисептик, беш беткап, оксолин майы жана резина колкап болушу шарт. Ансыз мугалимдерге сөгүш жарыяланып, ата-энелер айып пул тартышы мүмкүн.
Бул жаңы талап президент Бердымухамедовдун коронавируска каршы кызыл мыянын тамырынын дарылык касиетин изилдөө тууралуу буйругунан улам келип чыккан. Түркмөн лидери 25-декабрда өкмөт жыйынында мыянын тамыры коронавируска каршы даба болушу мүмкүн экенин айткан.
"Мыянын тамыры илгертен бери элдик медицинада ички илдеттерди, жөтөлдү, бөйрөктүн, дем алуу органдарын жана он эки эли ичегинин жараларын дарылоодо колдонулуп келген" деп билдирген президент.
Ал ошондой эле кызыл мыянын 15 түрүнүн төртөө Түркмөнстанда өсөрүн айткан. Түркмөн лидери бул өсүмдүктүн тамырында глицирризин кислотасы көп экендигин белгилеп, өлкөнүн Илимдер академиясына мыянын башка пайдалуу касиеттерин «кылдаттык менен изилдөөнү» тапшырган.
Ал арада "Азаттык" радиосунун Лебап облусундагы кабарчысы кызыл мыянын ширесин милдеттүү түрдө сатып алуу жарандар үчүн кошумча чыгым экенин белгиледи.
"Аймактык дарыканаларда ширенин баасы баасы 30-40 манатты түзөт. Бул 23 доллардын тегерегинде болуп калат. Ошол эле учурда, экономикалык кризис күчөп, калктын материалдык абалы начарлап баратат. Кышында аймактагы айрым үй-бүлөлөр балдарына жылуу кийим, бут кийим ала албай жатат. Айылдагы балдар үйүнөн бир нече чакырым алыс жайгашкан мектептерге барууга аргасыз", - деди кабарчы.
Былтыр окуу жылында түркмөн окуучуларынын ар бири дары- дармек үчүн жеке баштыкча алып жүрүүгө милдеттендирилген. Баштыкчада беткап, йод, резина мээлей, антисептик жана оксолин майы болушу керек. Жалпы баасы 180 доллар турган бул баштыкчанын ар бир окуучу мектепке такай жанына алып жүрүшү керек.
Президент Бердымухамедов буга чейин өз элин коронавирустан адырашман менен сактанууга чакырган. Ал бул өсүмдүк «түркмөндөр миңдеген жыл бою колдонуп келген, жаман адаттарга жана ар кандай жугуштуу ооруларга каршы даба экенин далилденген» деп чечмелеген.
«Азаттыктын» түркмөн кызматы Бердымухамедовдун мындай сунушунан кийин мамлекеттик мекемелерде, мектептерде күнүнө кеминде эки жолу адырашман менен ысырыктоо жапырт башталганын жазган.
Ошондой эле президент Бердымухамедов буга чейин 50дөн ашык китеп, анын ичинде «Түркмөнстандын дары өсүмдүктөрү» деген жыйнак жазган. Өлкөдө табыптар колдонмо катары президенттин дары чөптөр жөнүндөгү китебин пайдаланышат жана андагы маалымат мамлекеттик деңгээлде жайылтылат.
Ал эми Түркмөнстан коронавирусту өз аймагында бар экенин четке каккан БУУнун жападан жалгыз мүчөсү. Былтыр августта Дүйнөлүк саламаттык сактоо уюму өлкөдө өпкө кагынынан каза болгондор көбөйгөнүнө тынчсыздануусун билдирип, расмий Ашхабадга коронавирусту аныктачу тестирлөөнү өткөрүүнү сунуш кылган.
