Жогорку Кеңеш 10-сентябрда азык-түлүккө, өзгөчө нанга баанын кымбатташы жөнүндө маселени талкуулады. Премьер-министр Алмазбек Атамбаев кымбаттоонун себептери, көрүлүп жаткан чаралар тууралуу маалымат берип, бирок баалар дагы көтөрүлүшү мүмкүндүгүн билдирди. Өкмөт башчы айрым депутаттар сунуш кылып жаткандай буудайга мамлекеттик монополия киргизүүгө каршы экенин, кымбат болсо нан болуп турганы жакшы экенин баса белгиледи.
«Камеко» корпорациясы менен кыргыз өкмөтүнүн ортосундагы сүйлөшүүлөрдүн жыйынтыгы боюнча Кыргызстан «Центерра голд» компаниясындагы үлүшүн 30.66 пайызга жеткирди. Эми жаңы келишим парламентте ратификациядан өткөрүлүп, президент тарабынан бекитилиш керек. Депутаттар тарабынан жаңы келишим кандай бааланып жатат?
Жогорку Кеңеш бүгүн күзгү сессиясын баштады. Сессиянын алгачкы күнүнө премьер-министр баш болгон өкмөт мүчөлөрү, сот бийлигинин жетекчилери катышты. Депутаттар азык-түлүккө баанын көтөрүлүшү, мал ылаңы, чек ара жана башка бир катар маселелерди көтөрүп, кымбатчылык шартында жакыр катмарга жардам берүүнүн чарасын көрбөй жатат деп өкмөткө сын айтышты.
Жогорку Кеңеш күзгү сессиясын баштады. Ал эми Конституциялык сот жаңы конституцияларды кабыл алууга байланыштуу ар түрдүү арыздарды карай баштайт. 3-сентябрда Конституциялык сот «Арнамыс» партиясынын ондон ашуун мүчөсү берген арызды кароого киришет.
Мындан үч жыл илгери Түндүк Осетиянын Беслан шаарындагы №1 мектепке куралдуу террордук топ кирип келип, жүздөгөн балдарды барымтага алган. Бир нече күнгө созулган балдарды бошотуу аракетинен натыйжа чыкпай, 3-сентябрда атышуулар, чабуул башталган. Анда 334 адам, анын ичинен 186 бала өлүмгө дуушар болгон. Коомчулукта болсо Беслан алааматын болтурбай койсо болот беле деген суроо дагы турат?
Өкмөттүн 29-августта болгон жыйынында төрт маселе каралды. Алар жакынкы үч жылдын бюджети, мектептердин жаңы окуу жылына даярдыгы, Талдыбулак алтын кени жана нанга баанын кымбатташына байланыштуу маселе болду. Жыйында Кумтөр боюнча канадалыктар менен сүйлөшүү соңуна чыгып, өкмөттүн 30-августка белгиленген жыйынында жаңы келишим талкууланары ачыкталды.
Күзгү саясий күрөштөрдү утурлай өлкөдөгү саясат таануучулар кырдаалдын өнүгүшү боюнча өз божомолдорун жарыялашты. Анда күзүндө Кыргызстан кырдаал төрт багытта өнүгүшү ыктымал экендиги белгиленген.
Кумтөр кени боюнча кыргыз тарап менен Канаданын «Камеко» корпорациясынын ортосундагы сүйлөшүү негизинен соңуна чыгып, учурда тактоо иштери жүрүүдө. «Камеконун», «Центерра голд инк» компаниясынын биринчи жетекчилерин өкмөт башчы Алмазбек Атамбаев кабыл алып, пикир алмашуулар да болуп өттү. Кумтөр маселеси шаршемби күнгө белгиленген өкмөттүн жыйынында карала турган болду.
Кыргыз өкмөтү түзгөн эксперттик топ менен «Камеко» ушул жумада Кумтөр кени боюнча сүйлөшүү жүргүзүп, ал негизинен соңуна чыкты. Келерки жумада тараптар тийиштүү макулдашууга кол коюуну караштырууда. Учурда макулдашуунун долбоору такталууда. Айрым маалыматтарга караганда, сүйлөшүү Кыргызстан үчүн пайдалуу жыйынтыкталды.
Шанхай кызматташуу уюмунун Бишкектеги саммитине аз убакыт калууда. Азыркы мезгилде саммитке кайсы президенттер келери жана кандай документтерге кол коюулары айкындалып калды. Геосаясатта бүйүр кызыта турган маселе саммитке Иран президентинин катышуусунан келип чыгууда.
Президент ишкерликке уруксат берүүчү жана тескөө системасын өзгөртүү боюнча жардыкка кол койду. Бул системаны жеңилдетүүнү көздөгөн бул жардыкты ишкерлер колдоого алууда. Ошол эле мезгилде чакан ишкерлердин, соодагерлердин кызыкчылыгына доо кетире турган алкоголь тармагына байланыштуу мыйзам да жакын арада кабыл алынды.
Бишкекте өткөн жумада Кумтөр боюнча кыргыз өкмөтү менен Камеко корпорациясынын ортосунда сүйлөшүүлөр соңуна чыкты. Анда кыргыз тарап 2003-жыл 31-декабрдагы келишимди кайра карап чыгууну сунуштады. Канадалыктар сунуштарды карап чыгуу үчүн Торонтого жөнөп кетти. Бишкек бул сүйлөшүүлөрдүн жыйынтыгы боюнча Кумтөр кенинен көбүрөөк пайда көрүүнү көздөөдө.
Бишкекте бүгүн «Кумтөр» алтын кени боюнча келишимди кайра карап чыгуу тууралуу канадалык «Камеко» компаниясы менен Кыргызстандын Өкмөтүнүн ортосунда сүйлөшүүлөрдүн экинчи раунду башталды. Жабык өтүп жаткан жыйынга премьер-министр Алмазбек Атамбаев баш болгон өкмөт мүчөлөрү, эксперттик топ, парламент мүчөлөрү жана “Камеконун” жетекчиси Лен Хоменюк баштаган делегация катышууда. Кыргыз тарап 2003-жылдын 31-декабрында түзүлгөн келишимди кайра карап чыгууну көздөөдө.
Камбарата-1 ГЭСинин техникалык-экономикалык негиздемесин түзүүгө байланыштуу тендер 24-июлда өткөрүлөт. Ага катышууга даяр экендигин казак тарап билдирген. Ал эми Россиянын РАО ЕЭС компаниясы кызыгуусун жашырбай келатат.
28-июнда Бишкек шаардык соту оппозициялык «Бириккен фронттун» лидерлерине байланыштуу ишти карап, Биринчи май райондук соттун чечимин күчүндө калтырды. Фронттун өкүлдөрү соттун мындай чечимин канааттануу менен кабыл алып, мыйзамдуулук ордунда калганын белгилешти.
Бишкекте Жогорку Кеңештин кызматкери чет өлкөлүк атайын кызматтын өкүлдөрүнө жашыруун маалымат берип жаткан учурда кармалды. Ал кызматкер парламенттин басма сөз кызматында иштеп, Кытайдын атайын кызматы менен байланышта болгон деген маалымат айтылууда. Депутаттардын айрымдары парламентте эч кандай жашыруун сыр жоктугун айтса, айрымдары тескерисинче «купуя сыр» деген жазуу менен келген документтер көп болоорун белгилешүүдө.
Оппозиция лидерлери 21-июнда маалымат жыйынын өткөрүп, анда депутат Султан Урманаевдин үстүнөн кылмыш ишинин козголушун саясий буйрук менен жасалган иш катары баалашты. Оппозиционерлер ошондой эле Камбарата ГЭСтерине байланыштуу мыйзамды кабыл алууда мыйзам бузуулар болгонун айтышып, ал боюнча Конституциялык Сотко кайрылууну караштырып жатышканын билдиришти.
«Токтогул каскадындагы ГЭСтердин өзгөчө стастусу жөнүндөгү» мыйзамдан Камбарата ГЭСтерин чыгаруу жөнүндөгү мыйзам долбоору 15-июнда Жогорку Кеңеште колдоо тапкан жок. Бирок парламенттин отун-энергетика жана суу ресурстары боюнча комитети Камбарата ГЭСтерине байланыштуу жаңы мыйзам долбоорун ошол эле күнү иштеп чыгып, аны дүйшөмбү күнү парламенттин кароосуна сунуштоону чечти.
Аксы окуясын териштирүү иштери кайрадан башталууда. Башкы прокуратура Аксы окуясы боюнча буга чейин чыгарылган өкүмдөрдү жокко чыгарып, жаңы ачылган жагдайлар боюнча тергөө ишине жол берүүнү Жогорку Соттон өтүнүүдө. Сот 14-июнга ишти кароону белгилеп, бирок судьялар материал менен толук тааныш эмес деген жүйөө менен ишти кароону 28-июнга которуп койду. Бул чечим, Аксы окуясын териштирүүнү сот атайын создуктурууда деген айыптоолорду пайда кылды. 2002-жылдан бери аягына чекит коюлбаган Аксы окуясына жаңыдан ачылган жагдай жардам берип, акыйкат орноп, күнөөлүүлөр жазасын алабы?
5-июнда Жогорку Кеңеш Камбарата ГЭСтерин жана Бишкек ТЭЦин «Токтогул каскадындагы ГЭСтердин жана жогорку чыңалуудагы электр линияларынын өзгөчө статусу жөнүндөгү» мыйзамдан чыгаруу маселесин кароону улантты. Бул күнү президент Курманбек Бакиев парламентке келип, экономикалык багыттагы, анын ичинде Камбарата ГЭСтерине байланыштуу мыйзамдарды тезирээк кабыл алып берүүнү депутаттардан өтүндү.
Дагы жүктөңүз
